Envolvimentu empreza aziatika sira bele reduz kustu timoroan sira nian iha Greater Sunrise

Timor-Leste negoseia hela ho empreza aziatika sira hodi envolve iha dezenvolvimentu ba kampu Greater Sunrise nian no sosa ba gaz produzidu, hodi nune'e bele reduz kustu timoroan sira nian iha projetu, hatete fonte ida ne'ebé envolve iha negosiasaun ba Lusa.

"Saida maka negoseia hela bele sai realidade ba mehi ida ne'ebé atu lori gazodutu ba Timor-Leste ho kustu ida ne'ebé reduzidu ba kofre timoroan sira nian no sem estragus ba Fundu Petroliferu", hatete fonte ida ne'ebé hanesan.

Fonte ne'e esplika katak, estratejia ne'ebé iha meza leten maka hare envolvimentu empreza aziatika sira ba iha komponente relasiona ho 'upstream' posu sira Greater Sunrise nian, no mós iha 'downstream', too iha kosta súl Timor-Leste nian no too ba iha tratamentu iha rai.

Iha projetu petroliferu sira, 'upstream' abranje atividade esplorasaun sira, perfurasaun no produsaun no 'downstream' maka hanesan aktividade transporte, distribuisaun no komersializasaun.

Akordu ne'ebé boot liu maka inklui investimentu iha operasaun ba posu sira, finasiamentu ne'ebé di'ak liu hosi kreditu sira ho taxa ba juru sira ne'ebé minimu ba kustu 'downstream' nian no, iha reta final, garantia ba sosa gaz produzidu iha planta GNL nian (Gaz Natural Likefeitu) iha Timor-Leste.

Desizaun Timor-Leste nian hodi iha akordu ho petrolifera ConocoPhillips ba sosa ninian 30% partisipasaun iha konsorsiu posu Greater Sunrise mós halo parte iha estratejia ne'e.

Operasaun ne'e aprovada ona iha Konsellu Ministru, no sei integra iha Orsamentu Jeral Estadu nian ba tinan 2019 no tenki liu prosesu barak, inklui mós autorizasaun regulador sira nian no rede sira seluk parseiru konsorsiu ne'ebé bele ezerse direitu preferensial.

Iha semana kotuk iha Lisboa, Xanana Gusmão - ne'ebé maka lidera negosiasaun konabá prosesu hotu ho Timor-Leste nian naran - esplika katak aleinde sosa, Governu mós hahú ona "kalendariu ida atividade nian, iha aspetu sira oioin, no mós kontaktu sira" tanba nasaun ne'e presiza "kompañia ka parseiru sira seluk".

Pozisaun Timor-Leste nian maka sosa pozisaun Conoco nian hodi ajuda avansa objetivu hodi lori gazodutu ba súl Timor-Leste nian.

"Se buat hotu lao ho diak, iha final tinan 2021, aranka ona obra sira plataforma iha tasi, gazodutu no planta GNL nian (Gáz Natural Likefeitu) iha Timor-Leste, hatete Xanana Gusmão, no esplika mós katak obra sira ne'e sei remata iha final tinan 2025 hodi Timor hahú kedas produz gáz iha tinan tuirmai.

Tuir estimativa, projetu dezenvolvimentu ne'ebé sei kusta too dolares millaun 13 - entre billaun 6 no 7 iha 'upstream' no entre billiaun entre 5,5 no 6 iha 'downstream' - fatura ba Timor-Leste bele sai boot.

Xanana Gusmão mós nota katak ho Timor-Leste ne'ebé halo parte iha konsorsiu iha parte da investimentu nian ne'ebé maka tenki suporta hosi nasaun - la fó sai valor hosi parsela ne'e - esplika mós katak kalkulu sira konabá saida maka ida-idak sei selu halo ona no estudu tekniku viabilidade nian mós konkluidu ona.

Solusaun ne'ebé boot, no sei envolve empreza aziatika sira, pretende atu konsegue kustu ba kofre timoroan sira nian bele "reduzidu liu", esplika fonte sira.

Solusaun ne'e, ho perfil sira ne'ebé maka sei konfidensial - tuir fonte sira ne'ebé maka Lusa rona - depende iha parte barak ba se maka sei assume titularidade igualdade 30% partisipasaun nian iha konsorsiu.

"Kestaun ne'e bele kondisiona desizaun parseiru sira seluk hodi uza direitu preferencial konabá sosa parte Conoco nian", hatete fonte ida.

Petrolifera sira ne'ebé envolve iha konsorsiu ne'e sente la hakmatek se igualdade ne'e kontrola diretamente hosi Governu timoroan, liu-liu hosi petrolifera nasional.

Fonte ida hatete ba Lusa katak, se ida ne'e akontese duni projetu ne'e bele "blokeadu" tanba naran detentor 20% ba kontrolu nian iha konsorsiu iha poder vetu nian konabá modelu dezenvolvimentu.

Nota mós katak Ministeriu Petroleu no Minerais (MPM) timoroan inskreve dolares millaun 350 ba operasaun iha kontas sira Timor Gap nian ba tinan 2019, iha ámbitu proposta ba Orsamentu Jeral Estadu nian ba tinan 2019.

Valor dolares millaun 374 ne'e mós halo parte hosi MPM nian orsamentu no mós ba instituisaun sira ne'ebé maka nia tutela, inklui mós petrolifera timoroan, Timor Gap.

Konsórsiu Greater Sunrise nian lideradu hosi autraliana Woodside, operadora (ho kapital 34,5%), no inklui mós ConocoPhillips (30%), Shell (28,5%) no Osaka Gas (10%).

Semana ne'e Woodside konsidera katak "haketak" investimentu sira ba komponente oioin projetu nian hodi ajuda rezolve difikuldade konabá negosiu ne'e.

"Se haketak projetu ne'e - signifika katak propriedade unidade onshore no gazodutu ne'e diferente ho upstream ida - nune'e ita bele hare dalan ida hodi investe iha upstream no ida ne'e hanesan modelu ida ne'ebé ita hare iha Indonezia no iha Malazia no ne'ebé maka funsiona forma ida ne'ebé maka efikaz", hatete Coleman.

Diretora finanseira petrolifera nian, Sherry Duhe, konfirma iha loron-segunda ne'e katak Woodside no parseiru sira seluk hosi konsorsiu sei deside "iha tempu badak nian laran" se sira ezerse ka lae direitu preferénsia sira nian konabá Conoco nian.

SAPO TL ho Lusa