PN Aprova Orsamentu Sosa Partisipasaun Shell Milliaun $300

DILI, (TATOLI) – Parlamentu Nasionál (PN) liuhosi votasaun iha faze espesialidade Orsamentu Jerál Estadu (OJE) 2019, aprova ona proposta númeru 118 husi bankada governu ho votu a favór 41, kontra 23 no abstensaun 1, hodi aumenta orsamentu milliaun $300 hodi sosa partisipasaun iha empreza petrolífera Shell ho porsentu 26,6 iha konsórsiu Greater Sunrise.

Proposta ne’e distina iha Diresaun Nasionál Administrasaun Finansa, kategoria despeza transferénsia públika ho dotasaun iniasiál milliaun $378,747, alterasaun milliaun $300, ho dotasaun finál ba kategoria milliaun $678,747.

Deputadu proponente sira fó justifikasaun, transferénsia públika ne’e iha Ministériu Petróliu no Minerál (MPM) ho montante milliaun $300, hodi kapitaliza empreza públika Timor Gap, atu lori Estadu nia naran partisipa iha konsórsiu Greater Sunrise.

Proposta ne’e mós esplika, reforsu ne’e sei la hasai no halo redusaun ba despeza seluk iha proposta lei OJE 2019.

Deputada Maria Fernanda Lay, husi bankada Kongresu Nasionál Rekonstrusaun Timor (CNRT-sigla portugés), nu’udar proponente, argumenta kona-ba aumenta transferénsia milliaun $300 relativu ho asaun Shell, sei tau hamutuk ho milliaun $350 ne’ebé Governu prevee ona iha proposta orsamentu tinan ne’e, kona-ba capital expenditure (capex) atu halo investimentu hanesan iha alterasaun dahuluk ne’ebé halo ona ba lei atividade petrolíferu.

“Tuir alterasaun dahuluk ne’ebé halo ona ba lei atividade petrolíferu, ho porsentu 50 ne’ebé fó ba governu atu halo investimentu iha ona retornu menus tinan 10, porvolta billiaun $5, ne’ebé reforsa ita nia fundu petrolíferu”, tenik.

Hatutan: “Hodi nune’e mak ami nia hanoin ita nia dependénsia ba fundu petrolíferu tenke diversifika no fó tan rendimentu enkuantu ita hein investimentu ba esplorasaun kona-ba reseita doméstika, para iha futuru ita labele depende ba fundu petrolíferu”.

Deputadu Duarte Nunes, husi bankada CNRT ne’ebé hanesan mós proponente reforsa proposta ne’e mai tanba prezidente Repúblika (PR) veta lei atividade petrolífera ne’ebé halo revizaun iha semana hirak liubá.

“Tanba ne’e mak ami aumenta milliaun $350 hodi kompromisu ne’ebé Timor-Leste halo ona ho empreza rua ne’e”, katak.

Deputadu Joaquim dos Santos husi bankada Frente Revolusionária Timor-Leste Independente (FRETILIN) konsidera verba ne’ebé aprezenta husi bankada governu ne’e ilísitu, tanba proposta ne’e la respeita ona lei atividade petrolíferu ne’ebé orienta.

“Fundamentu tebes bainhira foti osan liu Rendimentu Sustentavel Estimadu (RSE), presiza espíritu lei ida ne’ebé halo diversifikasaun ekonómiku iha setór seluk, alende investe iha petróliu. Tanba lei atividade petrolíferu fó limitasaun ba porsentu 20 de’it”, dehan.

Hodi fó sujestaun ba Governu, hodi proposta orsamentu ne’ebé viola lei em vigór, di’ak liu hadi’a hafoin ajusta no halo orsamentu suplementár ou retifikativu.

Antes ne’e, governu prevee ona orsamentu milliaun $350 iha proposta lei OJE 2019, hodi sosa partisipasaun porsentu 30 iha empreza petrolíferu ConocoPhillips iha konsórsiu Greater Sunrise.

Jornalista: Julia Chatarina | Editora: Rita Almeida

Imajen: Votasaun finál globál proposta lei Orsamentu Jerál Estadu (OJE) 2018 iha uma fukun Parlamentu Nasionál. Imajen António Goncalves