DILI, (TATOLI) - Bankada
opozisaun Frente Revolusionáriu Timor-Leste Independente (Fretilín), ohin,
(Kinta) walk out (auzente) iha plenária hodi diskute kona-ba konfirmasaun Lei
Atividade Petrolíferu (LAP) ne’ebé antes ne’e Prezidente Repúblika (PR),
Francisco Guterres “Lu-Olo”, veta.
Tuir komunikadu
imprensa ne’ebé Tatoli hetan asesu hosi Bankada Fretilín fó
sai katak razaun hosi Bankada Fretilín la partisipa iha plenária tanba
defende alterasaun LAP kontra konstituisaun no lei ne’ebé vigora, no fó ameasa
ba transparénsia iha indústria extrativa no setór petrolíferu.
Tanba ne’e, iha 10 Janeiru 2019,
Bankada Fretilín deside la marka prezensa iha sesaun plenária estraordinária
parlamentár nian ne’ebé ajenda atu halo konfirmasaun ba lei No13/2005 kona-ba
atividade petrolífera.
Iha loron 15 Novembru 2018,
Bankada Fretilín foti pozisaun vota kontra proposta alterasaun lei No 13/2005
tanba viola konstituisaun Repúblika Demokrátika Timor-Leste (DRTL) no mós lei
internasionál kona-ba tratadu internasionál sira, tanba bainhira tratadu
fronteira Marítima Timor-Leste ho Australia seidauk ratifika, tratadu ida ne’e
seidauk vinkula. Nune’e alterasaun lei ne’e mós fó ameasa ba transparénsia iha
indústria extrativa no setór petrolífera.
Bankada Fretilín nia preokupasaun
ho proposta alterasaun ne’e estende mós ba risku ne’ebé bele korrompe ho ita
nia úniku fundu soberanu, fundu mina rai.
Razaun seluk mós, Bankada
Fretilín anota katak aprezentasaun ne’ebé Reprezentante Espesiál Governu, Kay
Rala Xanana Gusmão, hala’o iha loron 8 Janeiru hanesan aktu fé ida ne’ebé la
aprezenta faktu sira konvense reprezentante sira. Tanba ne’e mak aktu ida ne’e
fó liu tan razaun ba ami atu fó razaun ba Xefe Estadu, Lú-Olo nia veto ba
proposta alterasaun ba lei ne’e.
Ho hanoin hirak ne’e, Bankada
Fretilín foti desizaun atu la partisipa iha sesaun ba konfirmasaun LAP hodi
prienxe kuorum tuir ezijénsia hosi artigu 88, saline 3 Konstituisaun RDTL.
Entretantu, Fretilín metin
nafatin iha prinsípiu atu asegura futuru nasaun nian. Atu asegura Estadu RDTL
kontinua ho poupansa natoon iha fundu mina rai hodi mantein investimentu iha
setór produtivu sira.
Ho nune’e mak Bankada Fretilín
determindu atu defende nafatin interese povu no nasaun nian, no firme iha ninia
konviksaun atu proteje osan povu nian hodi benefisia, la’ós de’it jerasaun ida
ne’e nian maibé jerasaun sira sei tuir mai.
Enkuantu Deputadu Bankada Partidu
Demokrátiku, Adriano do Nascimento vota kontra lei ne’e tanba atu foti osan la
liuhosi tribunál kontas nian.
“Ha’u vota kontra la’ós lakohi
sosa asaun maibé ha’u kontra prosedimentu atu hasai osan no la liu tribunál
kontas nian, ha’u hakarak foti osan tenke hetan fiskalizasaun previa hosi
tribunal kontas, tanba ne’e dezde inísiu ha’u vota kontra,” Deputadu Bankada
Partidu Demokrátiku, Adriano do Nascimento iha plenária hafoin vota kontra LAP,
ohin.
Jornalista: Zezito Silva | Editór:
Manuel Pinto
Imajen: Debate espesialidade OJE
2019 iha uma fukun, segunda, (18/12). Imajen Antonio Goncalves
Sem comentários:
Enviar um comentário