Funsionáriu 273 Hosi MEJD Halo Protesta Tanba La Kontinua Kontrata

DILI, (TATOLI) – Funsionáriu kazuál na’in 273 hosi Ministériu Edukasaun, Juventude no Desportu (MEJD) halo protesta hasoru ministra tanba la kontinua kontrata funsionáriu hirak ne’e. Entretantu tuir ministra Dulce de Jesus Soares, ministériu sei halo diagnostika hodi haree nesesidade.

Asaun ne’e hala’o iha MEJD nia oin hafoin konferénsia imprensa iha salaun Edukasaun Naun-Formál Vila Verde, ohin dader.

“Tanbasá hapara ami-nia termu kontratu sein avaliasaun? Keta ami-nia komportamentu ruma ladi’ak iha ami-nia serbisu fatin karik? Razaun hapara kontratu serbisu tanba saida?”, kestiona portavós funsionáriu kazuál na’in 273, Silvestre dos Santos A. da Silva, liuhusi konferénsia imprensa, perante jornalista sira.

Silvestre da Silva akresenta programa oitavu governu konstituisionál mak atu kria kampu traballu, hamenus dezempregu maibé polítika MEJD atu hapara serbisu para aumenta tan dezempregu.

Bazea ba lei, artigu 50 kona-ba direitu traballadór, alinea três (3) hateten labele hapara serbisu na’in sira bainhira la iha kauza justu.

Nune’e ezije ba MEJD buka solusaun ba sira no kestiona nafatin katak tanba saida loke konkursu públiku, nusa la dezenvolve de’it ona sira ne’ebé iha ministériu ne’e? planu ne’e ministériu halo, tama ona iha planu nasionál funsaun públika? Tanbasá ne’e mosu de’it iha Ministériu Edukasaun, ministériu seluk la iha? Konkursu ne’ebé ministériu dehan ne’e, internu ka públiku? Avaliasaun durante ne’e hetan muito bom.

“Karik konkursu, balun ne’ebé la hetan oportunidade ou la pasa, maizumenus garantia saida mak bele ba ema sira ne’ebé serbisu tempu naruk ona iha Ministériu Edukasaun?,” kestiona tan.

Nia hatete estatutu serbisu funsionáriu kontratadu nian hanesan ona permanente, seguransa sosiál ne’ebé ko’a osan hanesan mós permanente sira. Maneira ne’e rasik tuir avaliasaun ka oinsá?

Hatan ba preokupasaun ne’e, MEJD, Dulce de Jesus Soares ho nia Vise, João Zacarias Freitas Soares, realiza enkontru ida ho reprezentante funsionáriu na’in 273 ne’e hodi rona diretamente sira-nia hanoin no preokupasaun.

“Funsionáriu kazuál ne’ebé ministériu la hanaruk kontratu, ohin ami halo dialogu ida, ministériu fó hatene katak ministériu sei halo diagnóstiku ida atu haree filafali nesesidade ba instituisaun, forsa traballu saida mak ministériu presiza, liliu atu haree katak tarefa ne’ebé mak ministériu presiza halo, depois ita ajusta ho nesesidade Ministériu Edukasaun, depois ita sei halo rekrutamentu ba ema ne’ebé mak ita nesesita tuir nesesidade ministériu nian”, katak Ministra Dulce de Jesus Soares ba jornalista sira iha MEJD, Vila Verde.

Kona-ba razaun, Ministra Dulce de Jesus hateten: “Ha’u atu klarifika ministériu la hapara kontratu ida. Maibé kontratu em si (rasik) hotu iha 31 dezembru. Se hapara, bainhira ha’u sai ministra, ha’u hapara kedas. Ami la hapara kontratu maibé kontratu ne’e rasik ramata iha 31 dezembru 2018”.

Governante ne’e akresenta MEJD la estende tanba sei halo diagnóstika iha MEJD, depois atu haree, identifika serbisu iha MEJD tanba agora forsa traballu ne’e porsentu 50 husi funsionáriu kazuál.

“Entaun situasaun instituisaun que laduun seguru. Presiza halo prosesu ida, nune’e bele garante katak iha ema ne’ebé loloos ho kualifikasaun loloos atu bele kontinua serbisu iha Ministériu Edukasaun”, esklarese ministra.

“Nakloke mós ba sira atu bele aplika. Maibé, sei liuhusi prosesu rekrutamentu ida”, subliña ministra hodi responde mós jornalista sira kona-ba oinsá posibilidade funsionáriu kazuál ba iha permanente.

Tratamentu Hanesan

Ministra Dulce de Jesus Soares realsa funsionáriu kontratadu sira ne’e MEJD halo tratamentu hanesan, la haree se de’it. MEJD la hapara de’it mak instituisaun Infordepe ho inspesaun jerál tanba iha autonomia administrativa no finanseiru.

“Sira 273 ha’u la identifika katak sira husi partidu ne’ebé? Sira hotu ne’ebé kontratadu iha Ministériu Edukasaun, hahú 1 janeiru to’o 31 dezembru, la’ós hapara, maibé la kontinua sira-nia kontratu”, konklui.

Funsionáriu na’in 273 ne’ebé nia kontratu termina iha 31 dezembru 2018 ne’e bazea ba seguimentu memorandu xefe gabinete MEJD, Teresinha Gusmão, Ref. No. 005/GMJD/IX/2018, 6 dezembru 2018, enkamiña ba diretora ho Depaxu Ministeriál, nú. 14/GMEJD/XII/2018.

Karta enkamiñamentu ne’e ho nú. Ref. 0197/DGAF/MEJD/XII/2018 ho klasifikasaun urjente ba Diretora Nasionál Rekursu Umanu, Adelina Caldeira dos Reis Noronha.

Karta ne’e rasik ho data 10 dezembru 2018 no asina husi Diretór Jerál Administrasaun no Finansa, Abrão dos Santos.

Jornalista: Rafy Belo | Editora: Rita Almeida

Imajen: Ministra Edukasaun, Juventude no Desportu, Dulce de Jesus Soares