DIREITU BA MANIFESTASAUN…!!!

Jornal Nacional, editorial

Pedidu Cornelio Gama alias L-7 nian nebe haruka ba Polisia Nasional Timor Lorosae atu halo manifestasaun iha loron 22 to’o 28 fulan Junho nee parte polisia la autoriza tamba konsidera kontiudu karta la klaru.

Desizaun polisia nian nebe la autoriza L-7 halo manifestasaun nee halo L-7 gerah ka hirus hodi konsidera polisia nebe iha komanda Ministeriu Interior nian halo ameasa, ditadura hodi hatauk ema halo manifestasaun.

Agora kontiudu karta lisensa ba manifestasaun nebe karik la klaru nee bele hadia maibe atu dehan la autoriza atu halo manifestasaun nee bele viola konstituisaun artigu 42 nebe koalia ‘ liberdade reuniaun no manifestasaun’ no iha alenia 2, rekuniese ema hotu- hotu iha direitu ba manifestasaun, tuir lei haruka.

Manifestasaun nee direitu sidadaun nian, tan nee labele proibe ema atu halo manifestasaun, naran katak manifestasaun nee lao iha koridor respeita ema seluk ninia direitu, laiha violensia no mos la provoka disestabilidade seguransa nasaun nian.

Sa tan, ohin loron nee polisia autoriza Juventude hadomi futebol ‘AMANTE’ halo manifestasaun iha instalasaun Federasaun Futebol Timor Leste (FFTL) nian oin hodi ejiji disolve FFTL nebe konsidera hakiak mafiozu.

Maske manifestasaun nee seidauk halo maibe kontiudu pedidu nebe Cornelio Gama L-7 haruka ba Polisia nee koalia konaba injustisa, ejiji justisa popular, pas no korupsaun nebe buras iha timor laran tomak, koalia konaba justisa ba problema 1975 -1999 no koalia konaba problema Mauk Moruk nian.

Hakarak lakohi, gosta ka lagosta, finalidade mak polisia tenki autoriza, se lae nee mos injustisa boot ida, autoriza grupo ida halo manifestasaun maibe labele autoriza fali grupo seluk uza ninia direitu nebe kotempla iha konstituisaun.

Laos ladiak halo manifestasaun, komisaun orgaizador bele iha hanoindiak, L-7 bele iha hanoin diak atu hatoo ba estadu, mainefestantes mos hakarak sira nia hanoin ba estadu, maibe keta haluha ohin loron nee problema sosial barak, desempregu barak, tan nee se manifestasaun la kontrola didiak bele ema terseira parte (pihak ke 3) bele aproveita momentu nee hodi halo violensia, ikus mais organizadora mak tenki lori kulpa.

Laiha duvida, no mos lei labandu, naran katak manifestasaun nee tenki organiza didiak hodi nunee objektivu nee bele atinji duni, labele hakilar kakorok sai moras maibe ikus mai resultadu zero, pior liu tan mak mosu vitimas.

Karik Polisia aseita mak L-7 halo ona manifestasaun, nee segundo manifestasaun nebe L-7 Organiza, depois tinan 11 liu tiha, iha 2004, L-& organiza manifestasaun iha palacio governu nia oin, kontinua ho manifestasaun Igreja Katolika durante loron 19 nia laran kontra governu Mari Alkatiri no manifestasaun ikus petisionariu nebe nakfila ba violensia, manifestasaun 4 Setembro kontra polisia iha 2002.

Pedidu demostrasaun nee L-7 planeia nee bele sai dilema ba autoridade seguransa, tamba autoriza halo manifestasaun maibe la kontrola didiak bele hamosu instabilidade maibe se la aturiza viola konstituisaun no leis konaba manifestasaun nian.

Ne’ebe karik deside diak liu autoriza naran katak siguransa mak tenki metin, siguransa laos polisia deit, siguransa laos manifestante deit, presisia kooperasaun entre polisia ho manifestantes sira hodi kontrola pihak ke 3sira nebe gosta aproveita uportunidade hodi benefisia ba an rasik.(*)

Jornal Nacional, editorial