TL ADERE BA ASEAN, SETOR PRIVADU SEIDAUK PREPARADU

Direktur Exekutivo Camara Comercio Industria Timor-Leste (CCITL), Nuno de Rosario Trindade, dehan katak, kona ba Timor-Leste atu adere ba Association of South East Asia Nations (ASEAN), Setor Privadu ka Emprezario Nasional seidauk preparadu.

“Ita hatene katak atu sai membru ASEAN ne’e ninia prosesu agora ne’e iha ona klaran no mos tempu badak sei finaliza. Ita tama ba ASEAN entaun automatikamente integra ba merkadu ekonomika ASEAN, husi ponto de vizta Seitor Pribadu nian iha buat rua mak ita koalia hanesan oportunidade no ida seluk mak difikuldade, tanba ita hatene katak atu sai membru ASEAN depois integra iha komunidade ekonomika ASEAN fo mos benefisiu ba TL, mais dezafiu ne’ebe mak ita hasoru maka ita nia seitor pribadu seidauk preparadu,” hateten Direktur Exekutivo CCITL ne’e ba Jornalista sira iha ninia serbisu fatin, Akait-Dili, Segunda (15/06/2015).

Direktur exekutivo ne’e hatutan tan, maibe husi CCITL rasik hato’o ba Governu hodi serbisu hamutuk ho ita nia parseiro sira hodi fo atensaun ba asuntu refere li-liu hasa’e kapasitasaun liu husi treinamentu ba ita nia kompanhai lokal no trabalhador sira.

“Ita tama ba ASEAN depois integra ba merkadu ekonomika ASEAN ita tenke preparadu, atu nune’e hodi kompete ho kompanhia internasional sira, ida ne’e mak inportante. Mais hare ba kondisaun TL nian ita bele hateten katak ita iha faze ida fraku teb-tebes, tanba ne’e maka ita tenke kapasita an,” nia dehan tan.

Tantu, oras ne’e dadauk Governu liu husi Ministeriu Negosio Estranjeiro no Koperasaun (MNEK) serbiau maka’as hela oinsa atu adere ba ASEAN. Mia

Jornal Nacional