REZOLVE FUNSIONÁRIU IHA MAP, ESTANISLAU HALO DIAGNOSTIKU INTERNU

Ministru Estadu Kordenador Asuntu Eknomika no Ministru Agrikultura i Peska (MAP), Estanislau da Silva hatete katak, agora dadauk nia halo hela diagnostika internu ida hodi koloka funsionáriu sira iha MAP ba parte sira ne’ebé mak presiza, tanba funsionáriu iha MAP barak liu.

“Funsionáriu barak ne’e, ita labele muda arbiru deit, ami agora halo diagnostika internu ida, bainhira diagnostika ne’e hotu tiha, mak ita hare halo nusa mak koloka sira ba iha parte ne’ebé mak persija,”informa Estanislau da Silva ba jornalista sira iha Palacio Governu, Segunda (15/6), hafon hasoru malu ho Primeiru Ministru Rui Maria de Araújo.

Nia esplika, diagnostika internu ne’e, atu hatene lolos lala’ok ne’e to’o iha ne’ebé ona, saida mak persija hadia, saida mak persija atu kontinua, no saida mak persija atu halo foun.

“Ema balu koalia arbiru deit, hau husu bo’ot, se lahatene lolos lalika koalia, se hakarak hatene, ba to’o Ministeriu Agrikultura, gabinete nia odamatan nakloke, bele koalia ho hau ka Vice Ministru, ou tekniku sira iha ne’eba,”lamenta Estanislau.

Nia dehan, iha ministeriu Agrikultura ne’e, nia la’os servisu mesak, maibé sira servisu iha ekipa. Estanislau dehan, durante ne’e desizaun hotu ne’ebé nia hola mós, la’os nia mesak mak foti, maibé enkontru uluk ho Vice Ministru ho Diretores sira mak foin foti desizaun.

“Tanba desizaun ruma ne’ebé ke hau hola ne’e, sei afeita ba vida ema barak no Ministeriu ho nia funsionárius tomak,”tenik nia.

Nia haktuir, ministru ida ne’ebé nonok halo desizaun mesak deit ne’e, Ministru ida ne’ebé lahatene halo servisu. Desizaun ne’e tenke konsulta ho ema hotu ne’ebé mak servisu hamutuk iha ekipa ida nia laran.

Ministeriu ida-ida iha Governu nia laran, labele halo servisu fora husi lei, tanba lei organika Governu iha tiha ona, no lei organika kada ministeriu mós iha.

Nia esklarese, lei organika Ministeriu Agrikultura nian foin mak hetan aprovasaun husi Konsellu Ministru iha semana kotuk, bainhira Prezidente promulga ona lei ne’e, mak foin Ministeriu Agrikultura bele atua funsionáriu sira ne’e, atu ema labele akuza katak, nia (Estanislau) abuzu poder.

“Se agor hau hola medidas ruma antes lei organika Ministeriu hetan aprovasau, ema bele dehan, ida ne’e abuzu de poder, hau la gosta halo buat ida abuzu de poder ne’e,”relata Estanislau.

Nia esplika, medidas pontuais ne’ebé halo, ida ne’e atu fasilita deit servisu, maibé desizaun final ne’e, sei halo bainhira lei organika ne’e, promulga ona husi Prezidente da Repúblika.cos

Jornal Nacional