JSMP Forñese Treinamentu, Asesu Ba Justisa No Direitu Feto Iha Liquiça

Programa Monitorizasaun ba Sistema Judisiáriu (JSMP) lansa treinamentu ba Konsellu Suku hamutuk 100 iha Munisípiu Liquiça. Atividade ne’e parte ida husi USAID nia projetu Ba Distrito.

Treinamentu ne’e hala’o durante loron tolu hahú husi Tersa-Kuarta feira (9-11 Juñu) iha sede suku Vaviquina, Postu Administrativu Maubara, Munisípiu Liquiça.

Treinamentu ne’e foka liu ba feto sira nia direitu no asesu ba justisa inklui direitu ba igualdade, propriedade, alimentasaun no prosesu justisa formál. Tarjetu pastisipante iha treinamentu ne’e inklui Xefi Suku, Lia-na’in no reprezentante feto.

Modulu ne’e hanaran Asesu ba Justisa no Feto sira nia Direitu, ne’ebé implementa husi JSMP ho apoiu jenerozu husi povu Amerikanu liu husi USAID nia projetu Ba Distrito, hodi haforsa kapasidade ba membru konsellu suku-sira ne’ebé importante tanba iha kazu barak, lideransa lokál-sira mak ema primeiru ne’ebé komunidade kontaktu kona-ba asuntu oi-oin inklui prevensaun no rezolusaun konflitu.

“Apoiu jenerozu husi povu Amerikanu sei ajuda harii Timor-Leste hanesan nasaun ne’ebé moris iha dame, seguru no inkluzivu, ne’ebé sidadaun hotu bele asesu ba justisa,” hateten Diretór Misaun USAID John Seong, liu husi komunikadu imprensa ne’ebé redasaun Jornal Nacional Diário simu, iha Kuarta feira (10/6), “Governu Estadus Unidus orgullu tebes atu suporta JSMP no organizasaun seluk atu garante katak sidadaun hotu bele asesu sira nia direitu legál.”

Luis Oliveira Sampaio, Diretór Ezekutivu JSMP hateten katak, treinamentu ne’e importante ba lideransa komunitáriu sira tanba sira mak autór primáriu ne’ebé besik no hamutuk ho povu lor-loron no hein katak programa ne’e bele aumenta sira nia koñesementu relasiona ho kazu ida-di’ak nia natureza.

Formasaun ne’e foñese ba ema hamutuk na’in rua nulu resin ida (21), kompostu husi lideransa lokál sira inklui Xefi suku, Lia-Na’in no reprezentante feto, husi konsellu suku hamutuk hitu (7): Suku Guguleur, Guico, Lisadila, Maubaralisa, Vatuboro, Vatuvou no Vaviquinia.

“Ami espera katak formasaun ida ne’e sei prepara lideransa komunitária ne’ebé atu promove no hametin kultura inklusivu iha komunidade-sira leet ne’ebé feto sei hetan apoiu, protesaun, no igualdade,” dehan Fausto Belo Ximenes, Jestór ekipa Asesu ba Justisa husi projetu Ba Distrito.

Durante loron tolu, benefisiáriu sira sei aprende kona-ba, Direitu no lei iha Timor-Leste, Igualdade jéneru, Feto sira nia direitu, Violénsia doméstika, Asesu ba sistema justisa formal, Ajuda vítima sira iha komunidade.

“Informasaun ne’ebé ami hetan bele uza hodi eduka liu tan komunidade iha ami nia suku laran, liu-liu kona-ba oinsa feto sira bele asesu ba Justisa no oinsa atu buka dalan hodi rezolve problema feto nian iha suku laran no mós iha prosesu justisa formál,” hateten reprezentante Feto husi Suku Vatuboro, Luisa Fernandes Nunes.

Fó komentáriu mós ba formasaun ne’e, Xefi Suku Vaviquinia, Antoninho dos Santos, hateten “Ami sempre hetan dezafiu/problema barak wainhira tenta atu rezolve problema iha suku laran tanba dala barak ami rasik falta informasaun. Ho treinamentu ida ne’e, bele reforsa ami nia esforsu hodi rezolve problema hirak ne’e. Pur izemplu, problema ne’ebé mak tama kategoria hanesan Krime Semi-Públiku”.

Tuir planu treinamentu hanesan sei hala’o iha Postu Administrativu Liquiça hahú iha 15-17 Juñu 2015 no Postu Administrativu Bazartete hahú iha 18-20 Juñu 2015.*/dac

Jornal Nacional