Nesesidade Baziku ho Material Konstruksaun, Dominante Tama iha Portu Dili

Nesesidades bazikus ho material konstrusaun sivil nian maka durante ne’e domina tama mai Timor Leste liu husi odamatan bot Portu Dili.

Direitor Portu Dili, Lino Barreto, hateten, sasan importasaun   ne’ebe mak tama mai iha portu Dili mak hanesan sasan nesesidade baziku no mos material konstruksaun nian.

“Hau hakarak hateten katak, durante sasan ne’ebe mak tama liu husi Portu Dili mak hanesan sasan nesesidade baziku nian mak fos, mina inklui material konstruksaun sira ne’e, ne’ebe bele dehan pursentu sia nulu resin ualu mak sasan tama mai iha portun Dili. Ami sura katak, loron ida ro tama dala ida,” hateten Lino ba Jornalista iha nia kna’ar fatin Portu Dili, Kuarta (10/06/2015).

Iha parte seluk Deputada Brigida Correia, hanesan membru komisaun D Parlamentu Nasional (PN) ne’ebe trata asuntu kona ba Ekonomia Dezemvolvimentu hateten katak, sira nia kna’ar sempre preokupa hela no husu ba Governu presiza tau matan ba sasan sira ne’ebe mak tama mai, tanba hare katak, liu-liu ba sasan ne’ebe mak ilegais.

“Ami nia kna’ar sempre preokupa hela no husu ba Governu presiza tau matan ba sasan sira ne’ebe mak tama mai, liu-liu ba sasan ne’ebe mak ilegais, entaun Governu tenki konsidera no tenki halo kontrolu maximu ba sasan sira ne’ebe mak tama mai,” deputada Bankada CNRT ne’e dehan.

Prezidente komisaun D PN, Deputada Jacinta Pereira mos realsa tan katak, bainhira atu halo kontrolu diak ba sasan importasaun ne’ebe mak tama mai iha TL ne’e kompetensia MCIA nian ne’ebe sira mak presiza halo kontrolu. Mia

 Jornal Nacional