PM Rui Husu Tenke Serbisu Maka’as iha Seitór Turizmu

Turizmu hanesan fatór ida ne’ebé bele hatama reseitas ba estadu hodi dezenvolve ekonómia iha nasaun. Tan ne’e, Primeiru Minístru (PM), Rui Maria de Araújo hatete, presiza serbisu maka’as iha área turizmu nian.

“Ita presiza serbisu maka’as liu-tan iha área turizmu,” Rui Maria de Araújo hato’o kestaun ne’e ba jornalistas sira bainhira partisipa iha forum daruak (II) Sosiedade Sivíl nasaun lian Portugés (CPLP) nian kona-ba área turizmu ninian iha Sentru Konvensoes Díli, Sesta (17/07/2015).

Xefe Governu dehan, planu estratéjiku iha ona maibé presiza konsentra án hodi dezenvolve rekursus umanus atu nune’e orientasaun liu iha turizmu komunitáriu, eko turizmu ho turizmu istóriku ne’e bele realiza ona.

Entretantu, Deputada Komisaun D trata assuntu Ekonómia, Jacinta Abucau Pereira afirma katak  turizmu hanesan seitór ne’ebé produtivu teb-tebes.

Nia haktuir katak TL rasik dependente liu ba folin mina rai nian. Ne’eduni, turizmu importante tebes atu dezenvolve hodi nune’e bele hatama reseitas ba nasaun hodi hadi’a dezenvolvimentu iha rai laran.

“Liu-hosi reunioens ne’e bele rezulta planu di’ak atu nune’e bele iha planu hamutuk para haree hodi dezenvolve liu-tan ita nia seitór turizmu nian,” deputada Jacinta dehan.

Nia dehan, governu tenke hahú harii daudaun ona fatin turizmu prioridades sira ne’ebé maka iha ona, atu nune’e bele atrai turista sira ho rikeza naturais no paisajens ne’ebé maka iha. Tenki haree mós parte infraestruturas nian hodi kolabora hamutuk tanba ba oin TL iha poténsia turizmu ne’ebé boot tebes.

Deputada dehan, Ministériu Turizmu rasik hahú ona identifika fatin sira ne’ebé maka fó prioridade liu tanba Ministáriu rasik iha ninia planu asaun anuál ne’ebé liga ho orsamentu ne’ebé Parlamentu Nasionál maka sei aprova.

“Ha’u sente sira fó prioridade iha parte ne’ebé maka sira tenke dezenvolve iha tinan ne’e nia laran liga ho envelope fiskál ne’ebé maka distribui hosi komisaun fiskál orsamentu ninian,” nia haktuir.

Nia dehan, aproveita prezensa PM nian iha reuniaun refere atu husu hodi bele tau orsamentu ne’ebé boot iha dezenvolvimentu turizmu nian, tanba ho orsamentu ne’ebé maka boot sei hatama fali reseitas ne’ebé maka boot. Atu dezenvolve turizmu la’os orsamentu ki’ik oan.

Kona-ba preukupasaun ne’ebé oras ne’e daudaun  seitór privadus sira barak maka halai liu-ba iha área konstrusaun nian no menus liu atu investe iha parte turizmu nian, Jacinta hatete, presiza iha informasaun ruma ba emprezárius sira. Maibé depende mós koñesementu hosi emprezárius ne’ebé oinsá maka atu tau prioridade ba iha seitór ne’ebé nia iha koñesementu.

“Loos duni. Ita nia emprezáriu sira iha Timor-Leste ne’e sira halai liu-ba iha parte konstrusaun no projetus. Sira la haree áreas sira ne’ebé maka bele hatama reseitas barak ba ita nia nasaun ho ninia durasaun tempu naruk nian,” nia  rekoñese.

“Ita haree mínimu teb-tebes. Entaun presiza iha liña koordenasaun hosi ministériu relevante atu bele sosializa ou fahe informasaun kona-ba importánsia seitór sira iha futuru nian. Ita tenke hahú ona hanoin para investe ba iha seitór sira ne’e,”deputada hatutan. (Jon)

Matadalan