RENETIL Fó Formasaun ba Foinsa’e Sira

Organizasaun Rezisténsia Nasionál Estudantes Timor-Leste (RENETIL) fó formasaun ba foinsa’e sira ho objetivu katak oinsá atu fanu fila-fali foinsa’e sira atu hanoin hikas RENETIL nia luta ba ukun rasik an.

 “Formasaun ida ne’e oinsá hamosu hanoin foun ida katak atu fanu fila-fali foinsa’e kona-ba istória RENETIL nian durante luta ba independénsia,” Sekretáriu Jerál RENETIL, Demétrio Amaral hato’o lia hirak ne’e  iha nia diskursu ba abertura kursu foinsa’e sira iha Sede RENETIL, Faról, Díli, Sábadu (11/07).

Treinamentu ida ne’e halibur estudantes sira hosi UNTL, UNPAZ hamutuk na’in 35 no jerasaun lideransa foun RENETIL nian hodi apriende matéria hanesan istória RENETIL, lideansa no seluk tan.

Tuir nia katak  RENETIL organiza formasaun ne’e ba kader RENETIL ne’ebé iha tinan kotuk halo ona deklarasaun atu hamutuk hodi hametin prosesu libertasaun pátria no libertasaun povu.

Organizasaun estudantil ne’ebé harii iha tempu rezisténsia iha 1988 hodi halo rezisténsia ba libertasaun nasionál ne’e iha komitmentu boot atu kapasita foinsa’e sira iha área lideransa ninian hodi bele prepara futuru lideransa ne’ebé di’ak ba nasaun Timor-Leste.

Demétrio informa, maski lakon ona fundadór di’ak ida hanesan Saudozu Fernando La-Sama ne’ebé maka haksumik ona hosi ita nia leet, maibé haree katak organizasaun ne’e prezisa mantein valores sira ne’ebé maka importante hodi harii sosiedade TL ida ne’ebé maka  livre hosi exploitasaun, ignoránsia, sosiedade TL ida ne’ebé justu, sees hosi mukit no sosiedade TL ida ne’ebé  maka prospriedade.

Nia hatutan RENETIL hanesan instrumentu luta foun  ne’ebé válidu no estudante sira ne’ebé ohin loron sei apriende iha universidade, sira merese atu partisipa iha prosesu ne’e no organizasaun ida ne’e nu’udar patrimóniu sira nian tanba sira maka futuru lideransa hodi troka La-Sama no sira seluk.

Iha parte seluk, II Vise Prezidenti Konsellu Sentrál, Oscar da Silva tenik joven no estudante sira maka kandidatus, entaun obrigasaun ema hotu-hotu nian, liu-liu  ba senior sira nia obrigasaun  atu kria kondisaun ba kandidatus sira ne’e ba iha lideransa.

“Ita iha kaderizasaun karik ema hotu sei la sai lideransa  maibé ita tenkiser prepara, kontestu ida hanesan ne’e seidauk másimu maibé ida ne’e faze primeiru para ema ne’ebé maka iha kapasidade di’ak, hanoin di’ak atu kontribui ba nasaun ida ne’e,” dehan Oscar da Silva.

Oscar dehan katak estudantes agora tenki halo libertasaun ba povu, maibé estudantes sira la hatene nia papél oinsá maka atu kontinua ba oin, entaun presiza liu hosi formasaun ne’e hanesan matadalan ida ba foinsa’e no hafanu estudantes sira oinsá maka estudante sira hatene di’ak liu tan prosesu libertasaun povu no libertasaun pátria ne’ebé maka lutadór sira halo tiha ona. (Mj4)

Matadalan