PNTL KONTINUA INVESTIGA KAZU MM

DILI - Komandante Operasaun Interinu Servisu Investigasaun Kriminal Nasionál  (SIKN) Inspektor xefi Mouzino T. Coreia informa, prosesu kazu kona ba matebian MM nia prosesu lao hela liu-liu autor ne’ebé mak involve krimi iha momentu ne’eba.

“Kazu MM nian ne’e nia prosesu lao hela no Sira ne’ebé mak kanek hosi parte ami nian membru PNTL ho F-FDTL  sira komesa rekopera fali ona maibé  ne’e orsida Komandante Jerál  ho Jeneral mak resposta ami hare de’it ba kestaun prosesu investigasaun nian,” dehan Mouzino ba Jornalista iha Kuartel Jerál  PNTL,  Kaikoli Segunda  (24/08).

Entertantu, kona ba membru MM nia ne’ebé mak Komandu Operasaun kaer nia dehan, balun tama ona iha Prijaun preventiva liu-liu sira nain haat ne’ebé mak kaer antes tiru mate MM ne’e.

“Iha altura ne’eba mós membru MM nian ida kanek halo tratamentu iha Ospital Dili dia (18/08) ami intrega fali ona ba investigasaun Munisipiú Baucau hodi aprejenta ba Ministeriu Publikú (MP),” dehan Komandante ne’e.

Nia hatutan, kona ba autor ne’ebé mak harahun edifisiu Administrasaun Laga no tuda kareta Polisia Militar (PM) ho Polisia nian nia prosesu mós kontinua lao hela.

Entertantu Polisia Nasionál  Timor Leste (PNTL) liu hosi departamentu Servisu Investigasaun Kriminal (SIK) investiga hela oknum Migrasaun ne’ebé mak uza Pistola ameasa komunidade.

Komandante Operasaun Interinu Servisu Investigasaun Kriminal Nasionál  (SIKN) Inspektor xefi Mouzino T. Coreia informa, sira nia ekipa investigador to’o kedas fatin akontesementu hodi halo investigasaun ba akontesementu ne’e, maibé  dehan tiru ne’e dala ruma lalos, liu hosi investigasaun mak bele hatene klaru.

“Ami nia ekipa ne’ebé mak ba lokal de krimi investiga katak ne’e la’os tiru maibé  diskuidu mak kartus mamuk kona fali vitima ne’e mais la grave,” dehan Mouzino.

Hodi realsa, kronolozia akontesementu mak membru Migrasaun ne’e hamos hela nia kilat la save entaun Akontese insidenti diskuidu ne’e maibé la’ós ho intensaun.

“Iha investigasaun mak ita bele hatene ema ne’e lanu ka halo nusa ita la bele hare de’it nia hahalok maibé  presija hare hosi ijaminasaun,” Komandante Mouzino konta.

Timor Post