DESLUTU NASIONÁL PROJETU EMERJENSIA GOVERNU

Deslutu nasionál ne’ebé Estadu lansa tiha ona iha fulan Setembru liu ba, hanesan projetu emerjensia Governu hodi fahe osan ba grupu balu, tanba realidade ne’ebé hatudu dadauk agora ne’e, implementasaun ba deslutu nasionál husi membru Governu sira ne’e, runggu rungga los.

Diretur Ezekutivu Asian Justice And Right (AJAR) José Luis Oliveira hatete katak, kuandu ko’ali deslutu ne’e, signifika katak koremetan, bainhira ema ida lutu, nia senti triste hela tanba lakon buat ruma.

Nia haktuir, Governu inventa hodi gasta osan arbiru, tanba laiha ona hanoin seluk atu halo ba povu no nasaun ida ne’e.

“Programa Governu nian kona-ba deslutu nasionál ne’e, la esklaresidu ba públiku, ne’eduni nia implementasaun ne’e mós, dalabarak runggu rangga, no membru Governu sira mós la kompriende, i sira nia hahalok ne’e mós la ho sentidu ne’ebé mak lolos,”tenik José Luis Oliveira.

Nia hatutan, realidade ne’ebé iha depois implementasaun deslutu nasionál ne’e to’o agora seidauk hatudu sinal diak ida, tanba eis Primeiru Ministru Alkatiri dehan, sei mosu milagre ruma durante implementasaun deslutu nasionál ne’e.

“Problema ne’ebé ita tauk mak ne’e, milagre ne’e akontese iha saida, ita ne’e osan la’os solusaun ba buat hotu, hanoin atu halo milagre ho osan, gasta osan arbiru de’it,”relata José Luis Oliveira.

Estadu Timor Leste, lansa ona deslutu ka korementa nasionál ba povu Timor laran tomak, atu povu haluha tiha pasadu, hodi konsentra ba dezenvolvimentu nasionál.

Deslutu nasionál ne’e lansa ona husi fundadores nasaun Timor Leste iha Palacio Governu nia oin, hahú husi 4 de Setembru to’o 31 de Desembru. Seremonia deslutu nasional ne’e, la’os halo deit iha Municipiu Dili, maibé hala’o mós iha Municipiu 12 seluk.

Inisiativa deslutu nasionál ne’e, husi fundadores nasaun ne’e nian hanesan, Mari Bim Amude Alkatiri ho Kay Rala Xanana Gusmão.Objetivu husi koremetan nasional ne’e, atu transforma Timor-oan nia atetude halerik, triste, lamentasaun ba orgullu nasional, hodi nune’e hot-hotu bele senti orgullu ba sira ne’ebé fó tiha ona sira nia vida atu Timor Leste ohin bele sai independente.cos

Jornal Nacional