Garante Kualidade Prozetu, PN Husu MOP Halo Kontrolu

DILI - Atu garante kualidade obras iha rai laran, maka membru Parlamentu Nasional husu ba Ministeriu Obras Publiku atu halo kontrolu ba obras sira neebe maka seidauk finaliza, tamba agora udan hahu monu rai, Estrada tenke diak ho nunee povu agrikultor sira bele halo atividade hanesan bain bain.

Tuir prezidente Komisaun E neebe trata Asuntu Infrastrutura Pedro da Costa katak, agora udan hahu monu rai, tamba nee husu ba Governu liu-liu Ministeriu Obras Publiku atu halo kontrolu ba prozetu sira neebe maka too oras nee seidauk finaliza, tamba tempu udan Estrada ladiak defikulta tebes povu agrikultor sira atu halo atividade ba mai.

Hau hanoin atu garante kualidade de prozetu maka Ministeriu Obras publik tenke tun ba baje hodi halo kontrolu ba obras nee, no tempu udan hanesan nee kompania sira halao sira nia atividade ka lae, no oinsa atu garante kualidade iha tempu udan, tamba Estrada iha Ermera nian taka ho rai, no agora udan fo immpaktu bot ba movimentu sira neebe maka hakai iha area neeba,” dehan Pedro ba STL, Tersa (22/12/2015) iha nia knar fatin PN.

Nia informa liu tan katak, kondisaun Estrada kuandu diak maka povu la kestiona, no povu agrikultor sira mos badinas atu buka osaan liu husi negosiu kiik, maibe kondisaun Estrada kuandu la diak maka defikulta tebes atividade povu agrikultura sira nian.

Iha fatin hanesan Deputadu Paulino Monteiro hatutan katak, Ministeriu Obras Publiku bele halo kontrola maibe hare ba rekursu umanus iha Ministeriu nee sei menus tebes, tamba nee husu ba ADN maka tenke halo kontrola masimu, atu nunee prozetu sira nee bele lao tuir estandar neebe maka hakarak. Informasaun kompletu iha STL Jornal no STL Web, edisaun Kuarta (23/12/2015). Madalena Horta

Suara Timor Lorosae