Horta Sei Sai Sasin ba kazu Emília

DILI - Eis Presidenti Republika Jose Ramos Horta sei fo deklarasaun ba Tribunal Distrital Dili (TDD), kona ba kazu Emilia Pires no Madalena Hanjam.

Tribunal sei rona deklarasaun husi sasin neebe mak arola husi parte defesa Jose Ramos Horta iha loron 8 de Janeiru 2016 tuku 9:00 dader,  ba kazu Emilia Pires ho Madalena Hanjam kona ba sosa kama foun ba Hospital Nasional Guido Valedares (HNGV), iha tinan 2012 liu ba.

Hafoin julgamentu iha loron Sesta (11/12), iha Tribunal Distrital Dili, defesa husi arguida Emilia Pires, Advogadu Jose Pedro Camões hatoo pedidu ba tribunal katak, orariu atu rona sasin ba eis PR, Jose Ramos Horta nee mak iha loron 08 fulan Janeiru nee, ses husi loron nee labele tanba sasin nee sei halo viagem ba estrangeiru hodi kontinua ho nia serbisu iha neeba.

Ho pedidu neebe hatoo husi parte defesa, Tribunal nomos Ministeriu Publiku mos konkorda ho dala neebe mak temi ona. Nunee tribunal desidi kedas katak iha loron refere, iha parte dadersan tuku 09 ho balun sei rona deklarasaun husi sasin Ramos Horta no mos sasin Jose Abilio neebe uluk serbisu hamutuk ho arguida Emilia Pires.

Nunee tribunal mos hatete katak atu marka data sira tuir mai hodi rona tan sasin sira seluk neebe arola husi parte defesa maibe tribunal seidauk rona, depois loron (8/01/2016) rona tiha deklarasaun husi sasin nain rua nee mak foin bele hare fali data sira tuir mai. Informasaun kompletu iha STL jornal no STL Web, edisaun Tersa, (15/12/2015). Domingas Gomes

Suara Timor Lorosae