Diplomata iranianu sira sai hosi Arábia Saudita hafoin ko'a relasaun

Diplomata iranianu sira husik ona, iha loron-kuarta ne'e, Arábia Saudita, hafoin interupsaun ba relasaun sira ne'ebé fó sai hosi Riade tanba atake sira ba nia misaun sira iha repúblika islámiku, fó sai ohin hosi media ofisiál sira saudita nian.

Ema hosi embaixada iranianu iha Riade, no mós funsionáriu sira hosi konsuladu iha sidade Jeddah, husik ona nasaun "iha aviaun privadu ida iranianu nian", refere hosi ajénsia ofisiál SPA.

Televizaun ofisiál iranianu IRBI konfirma ona katak pesoál diplomátiku to'o ona iha Teeraun, hodi fó sai imajen sira hosi nia aviaun hafoin to'o iha aeroportu Mehrabad iha Teeraun.

Estasaun adianta ona katak aviaun loron diplomata iranianu na'in 54 no sira nia família, no simu ona hosi ministru-adjuntu Negósiu Estranjeiru nian.

Media sira hosi Riade refere ona katak diplomata saudita sira fila ona ba sira nia rain iha loron-tersa.

Autoridade sira hosi Arábia Saudita ko'a relasaun diplomátiku sira no ligasaun aéreu sira ho Teeraun hafoin multidaun ida ho hirus sunu parte balun hosi edifísiu hosi nia embaixada iha kapital iranianu no nia konsuladu iha Mashhad.

Protestu sira iha findesemana ne'e hanesan hodi hatán ba ezekusaun ne'ebé Riade halo ba xefe relijiozu xiita nian, Nimr al-Nimr, no iha sekuénsiaa hosi protestu xiita sira nian iha 2011.

Iha deklarasaun sira ba televizaun ofisiál, embaixadór iranianu iha Arábia Saudita, Hossein Sadeghi, konsidera ona natural hirus tanba ezekusaun Nimr nian, maibé nia kritika ona resposta ne'e iha referénsia ida ba atake sira ba reprezentasaun diplomátiku saudita sira nian.

"Maski protestu sira hanesan direitu ida hosi sosiedade sivil, asaltu ba embaixada ida no la respeita ba kompromisu sira bele prejudika imajen hosi Repúblika Islámiku nian", nia hatete.

SAPO TL ho Lusa – Foto: Ministru Negósiu Estranjeiru iranianu nian, Ibrahim al-Jafari. EPA@ Stringer