FUNDO MINA RAI AMEASADU…!!!

Jornal Nacional, editorial

Politiku nain sira kala ohin loron ne’e preokupa liu ba dezisaun Presidente Republika, Taur Matan Ruak nian nebe ezonera Chefi Estado Maior General Forsa Armada, Major Jeneral Lere Anan Timur hodi nomeia fali Brigadeiro General, Filomeno Paixao hodi sai polemika maibe haluha tiha problema ekonomia pais nian.

Fundo minarai nebe iha kondisaun ameasadu nee sei fo impaktu ba dezenvolvimentu nasaun no sustentabilidade vida pais nee tamba desenvolvimentu ekonomia, li-liu finansia estadu hanesan motor halo lao makina estadu.

Timor Leste nia problema agora mak rendementu ekonomia nasaun nian menus ba bebeik. Mina matan Kitan la produz ona, hela deit Bayu Undan maibe kampo mina ida nee mos ninia produsaun tun makaas, menus husi 4,000 ka da barril kada loron.

“agora folin minan mundial nebe kontiunua tun husi 31 USD kada barril maibe ninia produsaun nee tun too 2000/barril kada loron mak produsaun labele kontinua ona tamba intermus komersiu kustu operasional barak liu duke produsaun”Mericio Akara.

Durante nee Timor Leste simu osan husi prosesamentu kampu mina Bayu Undan no Kitan, osan sira nee mak estadu timor rai iha Banku Amerika nian nebe tinan – tinan governu hasai ba injeta Orsamentu Geral Estadu anual.

Relatoriu ikus husi Banku Central Timor Leste nian relata fundo minarai nebe rai iha banku amerika nian dolar biliaun 16 nebe iha posibilidade sei tun tan tamba hatam ba OJE hodi dezenvolve pais nee.

Husi previzaun ( kal kula) Sosiedade Sivil sira katak osan minarai sei hotu iha tinan hat oin mai (2020). Nudar estadu, li-liu governu nudar jestor ba administrasaun pais nian sa meius mak sei toma hodi resolve kestaun nee?

Problema mina folin tun, mina sira iha posu, Kitan no Bayu Undan maran sai dilema ba estadu. Mina matan boot Greater Sunrise seidauk bele desenvolve wainhira parte nebe pertense disputa, Timor Leste ho Australia seidauk difini fatin esplorasaun.

Laiha solusaun ba fatin prosesamentu kampo Gretare Sunrise nian tan nee akordu CMATS nebe governu rua asina too tinan 50 nee expire hodi nunee ohin loron nee nasaun rua, li-liu Australia no Timor Leste tenki difini fronteira maritime.

Agora ba timor dilema boot ida, folin mina mundial tun no kampo mina sira iha tasi laran mos maran dadauk ona, sa meius mak governu toma hodi infrenta situasaun sira hanesan nee?

Karik mina matan Bayu Undan, Kitan mos maran, osan Fundo Minarai 16 biliaun nee mos hotu, nasaun sei foti osan iha nebe hodi selu funsionariu publiku sira ? imprestimo? Ou tenki seriu ona hodi negosia prosesamentu kampo mina Greater Sunrise la ho difinisaun fronteria maritima ho Australia?

Hakakarak ka lakohi, Timor Leste nudar nasaun indepedente, tenki iha fundos rasik atu bele subrevive nasaun nee. *