KAUZA EKONOMIA TL, NÚMERU DEZEMPREGU AAS

Sekretariu Estadu Polítika Formasaun Profisional no Empregu (SEPFOPE) tinan-tinan esforsu-an maka’as forma Timoroan lubuk ida para kompete iha merkadu traballu ninian, maibé kontinua mosu númeru dezempregu aas tanba kresimentu ekonomia Timor-Leste (TL) la’o hakdasak hela.

“Agora dau-daun ita konsege forma ona Timoroan sira husi sertifikadu Fundasaun ninian husi nivel 1 to’o nivel 4 hamutuk ema nain 3800, maibé ita haree katak dezempregu sa’e bei-beik loron ba loron tanba de’it vaga servisu ne’ebé menus, tanba investor sira laduun mai investe iha ita nia rai, i liu-liu tanba ita nia kresimentu ekonomia Timor Leste mós la’o nei-neik ne’e maka fó impaktu ba dezempregu iha rai laran,”Diretor Jeral Planeamentu SEPFOPE, Jacinto Barros Gusmão ba jornalista sira iha salaun enkontru SEPFOPE Caicoli-Díli, Tersa (07/06/2016).

Nia esplika, loloos ne’e SEPFOPE planeia hela atu forma Timoroan sira para oinsa maka bele explora potensialidade TL ninian, maibé tanba TL hahú hela faze konstrusaun entaun SEPFOPE treina Timoroan barak liu iha area konstrusaun no ospitalidade ninian.

“Ita planu ona atu forma ema oinsa atu bele explora potensialidade Timor Leste ninian hanesan agrikultura, peskas, pekuaria no turizmu, maibé tanba ita tama hela iha faze dezenvolvimentu ninian, ita sei treinu ema barak liu iha área konstrusaun, ospitalidade no selu-seluk tuir merkadu traballu presiza,”dehan Jacinto Barros Gusmão.

Nia informa, nune’e SEPFOPE labele forma ema tuir ema ida-idak ninia hakarak, maibé forma ema tuir merkadu presiza, para nune’e karik fó treinamentu ba ema labele sai fali dezempregu, maibé tenki hetan servisu duni.

“Ita mós tenki hanoin katak Timor Leste iha potensia bo’ot ba natureza maibé ita maka seidauk explora ho di-di’ak, tanba Timor Leste potensia ba marmer, produtu lokal ne’ebé que orgániku ne’ebé bele exporta ba rai seluk, maibé tanba ita seidauk konsege explora di-di’ak sasan sira ne’e, karik ida ne’e maka ita explora fiar katak bele loke vaga servisu ba Timoroan sira para hodi bele hamenus dezempregu iha rai laran,”tenik DJ Planeamentu SEPFOPE.

Nia haktuir katak, agora dau-dauk mós SEPFOPE forma hela ema bazeia ba industria ninia hakarak, atu oinsa bele responde wainhira investor sira hakarak mai investe iha TL, tanba investor sira ne’e presiza ema ne’ebé ho kualidade di’ak atu servisu ho sira para sira bele hetan lukru. ves

Jornal Nacional