TDD Julga Kazu Membru PNTL Ataka Malu

DILI - Tribunal Distrital Dili (TDD) halao julgamentu ba kazu krime ofensas integridade fisika simples neebe involve membru PNTL nain rua husi unidade Task Force no BOP.

Tuir akuzasaun husi Ministeriu Publiku neebe lee sai husi juiz prosesu katak, iha loron 1 Agostu 2015 tuku 18:30 kalan iha salaun Madre Canossa Has Laran, Dili, lezadu Feliciano Perpetua Ximenes partisipa iha serimonia kazamentu iha salaun refere hahu husi tuku 10:00 too loraik laiha buat ida.

Momentu neeba mosu duni probema iha odamatan salaun nian, maibe lezadu konsege ba hakalma tiha situasaun no buat hotu lao ho diak fali. Bainhira serimonia remata lezadu mos ba hamoris nia motor atu fila ba Kuartel Polisia BOP iha Bairo Pite, la kleur Polisi Task Force ba ho kareta tolu atu kaptura lezadu.

Momentu neeba arguidu Jose Rangel hanesan Komandante lori kilat se kedas ba lezadu ho pozisaun atu tiru. Hafoin arguidu dehan ba lezadu katak keta bok an keta halai. Lezadu mos hatan ba arguidu katak imi labele se kilat mai hau, tanba hau laos kriminozu no terorista. Hau mos membru PNTL husi unidade BOP. Maibe arguidu responde katak imi BOP nee mak kleur ona ami buka,” haktuir Juiz Antoninho do Carmo iha TDD, Mandarin, Kuarta (08/06/2016).

Juiz nee hatutan, momentu nee lezadu mos simu liafuan hasoru arguidu katak BOP nee laos hau mesak maibe nee instituisaun PNTL. Lezadu mos foti telefone husi bolsu atu telefone ba Komandante BOP, derpenti arguidu tiru sae ba loron dala ida no arguidu nia membru seluk mos tiru ba leten dala lima.

Hatan ba akuzasaun nee Arguidu Jose Rangel hatete, akuzasaun nee balun los no balun sala. Los duni momentu nee nia mak lidera hodi halo intervensaun problema iha salaun Madre Canossa. Maibe laos uza kilat hodi tiru. Tempu neeba simu informasaun husi komandu dehan membru PNTL ida lori kilat tiru arbiru iha festa nee no halo ameasa ba konvidadu neebe tuir festa.

Antes ami ba halo intervensaun, sei halo uluk breefing kona ba netraliza situasaun no fo guarda ba membru neebe halo problema no armas neebe lezadu utiliza,”tenik Arguidu.

Too iha fatin akontesimentu arguidu hakbesik aan ba lezadu hodi konversa para bolu nia maibe lezadu la koopera. No iha momentu nee kedas lezadu hasai pistol husi nia kalsa bolsu parte liman los hodi atu tiru arguidu. Maibe arguidu soe aan ba motor ida neebe besik nia. Informasaun kompletu iha STL Jornal no STL Web, edisaun Kinta (9/6/2016). Domingas Gomes

Suara Timor Lorosae