Universidade Timor-Leste hato'o akordu sira mobilidade nian ba instituisaun luzófonu sira

Universidade Nacional Timor Lorosa'e, ne'ebé semana ne'e simu ba dala uluk reuniaun anual hosi Asosiasaun Universidade sira Lian Portugés (AULP) nian, hato'o akordu sira mobilidade nian ba reitór partisipante sira hotu, hatete hosi fonte organizasaun nian.

"Reitór hosi Universidade Nacional Timor Lorosa'e (UNTL) haruka ona email ida ba reitór sira hotu ne'ebé sei marka prezensa iha enkontru hodi hato'o akordu sira mobilidade nian", hatete hosi sekretária-jeral asosiasaun nian, Cristina Montalvão Sarmento, ba Lusa.

Tuir responsável, UNTL semana ne'e iha ajenda ida reuniaun bilateral sira ho reitór sira hotu ne'ebé sei marka prezensa iha enkontru AULP nian ba dala 26, ne'ebé "hanesan baibain" sei sai programa mobilidade, koperasaun no troka estudante sira nian hamutuk 10 ka 15.

"Potensialidade hanesan maka'as. Rezultadu sira sei depende ba futuru", hatete hosi Cristina Montalvão Sarmento.

Maski iha nia ezisténsia durante tinan 30 AULP halo ona programa multilaterál koperasaun rua, ida promove hosi Brazil no ida seluk hosi Portugal, agora daudaun laiha atividade ida.

"Akordu sira dalabarak hanesan bilateral, trilateral, laiha multilateralidade tomak", afirma hosi dirijente AULP nian hodi esplika katak mobilidade akadémiku funsiona, hanesan ezemplu, entre Brazil ho Timor-Leste ka entre Angola ho Portugal.

Maibé, AULP agora daudaun halibur kbiit sira hodi hahú projetu foun ida, ho títulu Programa Internasional ba Mobilidade iha Ensinu Superior entre Portugal ho Nasaun sira Lian Portugés nian no Makau (PIMES-PPLPM).

Asosiasaun esplika katak nia objetivu maka estimula deslokasaun hosi estudante eselénsia sira, profesór sira no investigadór sira iha espasu lian portugés nian ba instituisaun sira ensinu superior iha Portugal, liuliu liuhosi kriasaun ba rezidénsia ida besik iha sede, iha Portugal, no loke kandidatura sira ba bolsa sira ho dalan alojamentu di'ak.

Bainhira hatán ba Lusa kona-ba volume atual hosi mobilidade akadémiku iha luzofonia nia laran, sekretária-jeral hatete katak seidauk halo estudu ida ne'ebé permiti hatene loloos.

Tuir responsável, laiha posibilidade hodi hatene númeru total hosi estudante sira hosi universidade hamutuk 147 ne'ebé asosiadu ba AULP no mós númeru hosi estudante sira, bolseiru sira no profesór sira ne'ebé iha situasaun mobilidade iha rede nia laran.

"Rede hanesan kompletu tebes. AULP funsiona multilateralmente, membru sira hotu hanesan mós parseiru sira", nia afirma.

Tema jeral hosi reuniaun tinan ne'e, "Mobilidade Académica e Globalização no Espaço da CPLP e Macau", hili hosi UNTL no painel dahuluk sei ko'alia kona-ba polítika sira no estratéjia sira ne'ebé presiza hodi viabiliza mobilidade akadémiku iha nasaun luzófonu sira.

Reuniaun AULP iha Díli sei hala'o entre loron-kuarta ho loron-sesta no sei iha partisipante hamutuk na'in 150 resin.

SAPO TL ho Lusa