AHI HAN UMA 8 IHA AITARAK LARAN

Ahi han uma ualu  (8) to’o mutuk didiak iha Aitarak Laran (Palacio Presidensial) nia sorin, Aldeia Laloran, Suku Bairo Pite, Posto Administrativu Dom Aleixo Munisipiu Dili,    Domingu (31/7/2016), tuku 10:00 OTL.

Familia no vitima husi akontesementu ne’e lakonsege salva sira nia riku soin no sasan nesesidades nian, tanba  derepenti ahi tranbe sira nia horik fatin.  Korpu Bombeiro to’o duni fatin akontesimentu maibe sasan hotu la konsege salva tanba ahi han motuk hotu.

Dezastre ne’e halo ema barak hakfodak, nune’e nadodoan ba haree. Labarik, ferik, katuas no jovens sira hakonu istrada ibun Aitarak Laran nian hodi haree dezastre ne’ebe halo Tia Albertina Amaral triste no tanis nia halai deit ho ropa isin lolon.

Tia Albertina Amaral, konta tuir ba jornalista sira iha fatin akontesimentu katak, nia hakfodak derepenti ahi han nia uma no  ahi ne’e mai husi uma katuas Luis da Costa nian.

“Prepara hahan molok atu han hau nia oan sira hatete ba hau dehan ama han ona. Maibe hau resposta ba sira hau sei haris lai. Maibe derepenti ema hakilar husi sorin katak ahi han uma husi Luis nia mak mai. Hau halai ba liur husu ajuda lai hasai hau nia sasan. Tanba ahi han uluk iha hau nia kuartu. Hau nia sasan, hau nia osan, almari no sasan seluk iha uma laran ahi han hotu,”  tia Albertina hateten ho mata wen.

Nia dehan katak, tanba ahi han makaas ona, nia ho nia oan halai sai ho ropa iha isin lolon deit.  Ho akontesementu nee, nia husu ba Estadu atu ajuda netik nia atu bele moris, tanba nia ema alezadu ka strok neebe la bele halo buat ida.

“Durante nee hau moris ho osan neebe hetan husi ema aluga hau nia kuartu. Ema sira neebe aluga hau nia kuartu nee mos ninia sasan ahi han mutuk hotu, tanba nia nain sai hela no sira nia odamatan save hela,” dehan Albertina.

Nudar fetok faluk neebe tinan rua ona kona moras strok la bele halo buat ida, no nia garante moris ho osan neebe mai husi ema aluga ninia kuartu. “Hau teristi tebes, hau bele mate la buat ida, maibe sasan sira nee atu hela ba hau nia oan no bei oan sira. Maibe, agora  ahi han mutuk hotu ona, hau lahatene hau nia moris ba oin nee oinsa,” hatete Albertina ho tanis.

Luis Pereira da Costa nudar mos vitima dezastre ahi han uma ne’e ho laran teristi konta tuir katak, akontesementu ahi han uma ne’e  iha tuku 10 resin. Nia mos hakfodak derepenti ahi han nia uma husi sorin.

“Hau hakfodak ho akontesementu nee. Hau esforsu an atu salva  hau nia sasan iha uma laran, maibe lakonsege tamba ahi trambe husi leten,” hateten tiu Luis Pereira.

Iha nia uma mos ema aluga kuartu rua, maibe ema sira neebe aluga kuartu nee mos sira sasan lakonsege hasai tamba odamatan kuartu save hela. “Hau mos lahatene sira banebe too ahi han mutuk uma nee sira seidauk mai,” dehan Luis.

Nia mos husu ba Estadu ho Governu atu bele ajuda netik sasan ruma tanba ho kondisaun neebe mak sira infrenta halo sira lakon esperansa no sasan la aporveita.

“Hau la hatene ba oin nee moris oinsa tanba sasan iha uma laran motuk hotu. Hau halai sai ho ropa neebe iha isin lolon deit,” hateten tiu Luis.

Ministra Solidariedade Sosial, Isabel Guterres ho Administrador Munisipiu Dili, Gaspas Soares, Superintendente Asistentente Komando PNTL Interino Munisipiu Dili,  Euclides Belo, ho  Xefi Suku Bairo Pite João Baptista da Costa Belo, tuun direitamente ona ba haree kondosoens vitima sira nian no haree ahi suar no anar deit maka nakunu iha fatin akontesimentu. mia

Jornal Nacional