GOVERNU NOTIFIKA HASAI KOMUNIDADE VIZINU PALASIU PR

DILI - Governu liuhosi Sekretaria Estadu Terras no Propriedade (SETP) notifika kleur ona komunidade sira iha Palásiu Prezidente Repúblika nia oin no sorin karuk ne’ebé loron hirak liu ba ahi-han mutuk uma kain hitu (7).

“Karta notifikasaun ba komunidade sira hela palásiu  prezidente sorin simu ona, hein de’it  sira sai,” haktuir Diretór Interinu SETP, Horasio da Silva  ba Timor Post iha nia kna’ar  fatin Bebora, Dili, Segunda (1/08).

Horácio subliña, rajaun hasai komunidade sira iha área ne’eba tanba rabat los ho Palásiu Prezidente Repúblika hodi hatudu ambiente ladun di’ak.

Horácio hatutan, karta notifikasaun ne’ebé governu hasai ba komunidade palásiu  prezidente nia sorin, pakote ida ho karta notifikasaun ne’ebé governu entraga ba komunidade sira hela iha  palásiu  prezidente nia oin, area Aitarak Laran.

“Tuir prosesu legal, ho karta mandadu sira governu fó ona ba komunidade sira, hanesan avisu ida ba ita nia komunidade sira hodi prepara sira nia sasan, hodi muda antes. Mabé bainhira sira ulun to’os, prazu mandadu  remata, governu ezekuta, hakarak ou lakohi tenke hasai sira obrigatóriu,” haktuir Diretór Interinu ne’e.

Tuir regras, Horácio esplika, bainhira komunidade sira hetan notifiadaun no sai ho konsiénsia maka governu sei apoiu transporte  no bele apoiu umanitarian balun,  muda ba fatin ne’ebé sira desidi ona, maibé  sira ulun to’os bainhira  mandadu tun, governu ezekuta, sei laiha toleránsia.

Entretantu iha loron Domingu (31/07), ahi-han mutuk uma kain hitu kuaze metru 100 hosi Palásiu Prezidente Repúblika, iha aldeia Aitarak Laran, Suku Kampu Alor – Dili, tanba deskonfia ahi eletrisidade mak sirkuitu. Insidente insendiu ne’e la rezulta ema mate, maibé sasan uma laran kuaze la aproveita hotu.

Tuir observasaun Timor Post, uma iha area ne’eba rabat malu los no fasil tebes bainhira ahi han uma ida, da’et lalais ba uma seluk. Iha área ida ne’e governu hasai ona notifikasaun atu komunidade sira hamamuk tanba rabat malu ho Palásiu Prezidente, maibé to’o agora komunidade sira kontinua hela.

Investigasaun

Entretantu Komandante Polísia Nasional Timor Leste (PNTL), Komisáriu Júlio da Costa Hornay informa, nia parte halo dadaun investigasaun atu hatene lolo’os motivu insidente ne’e.

“Ita kontinua halo investigasaun tanba ita la hatene bele mós sirkuitu, bele mós emasengaja. Depois investigasaun maka ita haré,” afirma Komisáriu Hornay ba Jornalista sira iha Kuartel Jerál  PNTL, Kaikoli, Segunda (01/8).(max/way)

Timor Post