Siklista hosi Portugal no Kazakistaun manán etapa dahuluk hosi Tour de Timor

Siklista portugeza Celina Carpinteiro ho atleta hosi Kazakistaun Kirrill Kazantsev, iha loron-tersa ne'e, manán ona etapa dahuluk hosi Tour de Timor, ne'ebé hala'o entre kapital Díli no vila Manatuto. 

Iha sesaun maskulinu, klasifikadu daruak iha etapa ne'e maka portugés David Vaz, no portugeza Ilda Silva Pereira hela iha fatin daruak iha sesaun femininu, Celina Carpinteiro iha fatin dahuluk.

Timoroan dahuluk ne'ebé maka hakotu etapa, ho kilómetru 82,5, maka Jacinto de Jesus da Costa.

Edisaun Tour de Timor 2016 hanesan komposta hosi etapa lima iha bisikleta foho nian, konta ho partisipante hamutuk na'in 120 hosi nasaun 19, haktuir hosi informasaun ofisial.

Eventu desportivu, internasional liu hosi eventu sira ne'ebé hala'o tinan-tinan iha Timor-Leste, konta ho siklista timoroan na'in 60 no númeru hanesan hosi ema internasional sira, no destaka mós prezensa hosi timoroan dahuluk ne'ebé maka kompete tiha ona iha bisikleta foho nian iha Jogu Olímpiku sira Rio2016, Anche Cabral.

Etapa daruak, iha loron-kuarta, liga Manatuto ho Quelicai (Baucau) - iha distánsia ida hamutuk kilómetru 92,5 - no etapa datoluk liga fatin ne'e ho Iliomar (Lautem) iha sudeste, ho pasajen hosi Uatulari ho Uatucarbau (Viqueque) no distánsia total ida hamutuk kilómetru 83,5.

Etapa dahaat maka entre Iliomar ho Com (kilómetru 104) no etapa dalima entre Lospalos no Baucau, iha distánsia total ida hamutuk kilómetru 87.

 Sira ne'ebé manán sei fahe prémiu ida ho folin total dolár 58.000 no etapa dahuluk no etapa ikus prova nian rejista hosi Uniaun Siklista Internasional, hodi permiti ba ema sira ne'ebé manán bele akumula pontu sira ba nia klasifikasaun internasional.

"Objetivu hosi Tour de Timor maka promove desportu ho turizmu timoroan sira nian iha komunidade internasional", destaka hosi sekretáriu Estadu ba Juventude no Desportu, Leovigildo Hornai.

Harii iha tinan 2009 hosi Prezidente Repúblika iha tempu ne'ebá, José Ramos-Horta, Tour de Timor iha nia edisaun inaugural hetan ona partisipasaun hosi partisipante na'in 300 resin hosi nasaun hamutuk 12.

Ho etapa barak maka liuhosi zona foho sira hosi sentru Timor-Leste nian, korida ne'e bele sai todan tebes tanba kondisaun rai nian, tanba iha subida barak no temperatura ne'ebé aas tebes.

Promotór sira fó hanoin katak hanesan "loron lima paseiu todan sira no nakonu ho aventura" iha "paizajen sira ne'ebé furak natural, liuhosi foho sira no bee moos sira".

SAPO TL ho Lusa