DILI
- Polísia Nasionál Timor Leste (PNTL) haruka tiha ona karta notifikasaun ba
embaixada Austrália iha Timor Leste relasiona ho ninia sidadaun ida ho naran
Antonio Robertking ne’ebé polísia kaptura tanba kuda ai-horis droga ho tipu
Marijuana Kanabis iha nia uma.
Segundu
Komandante Jerál PNTL Komisariu Faustino da Costa hatete, karta
notifikasaun ne’e PNTL haruka nune’e parte embaixada bele hatene prosesu sira
nia sidadaun komete krime iha Timor Leste.
“Ami
hetan tiha kazu ne’e relatóriu tama hotu ami orienta ami nia diresaun
kompetente para halo notifikasaun sidadaun ne’e nian ba nia embaixada para sira
nia embaixada presiza hatene hodi bele akompaña,” dehan Faustino ba Jornalista
iha Kuartel Jerál PNTL Kaikoli, Segunda (17/10).
Nia
dehan, prosesu hotu parte Polísia nian halo hotu no intrega ona ba iha
Ministeriu Públiku (MP) hodi aprejenta ba tribunál nune’e bele hahú halo
primeiru interogatóriu.
“Ami
nia servisu maka halo hotu ona investigasaun no intrega ona ba Ministeriu
Publiku prosesu tuir mai iha tribunál maka sei fo sai,” dehan Faustino.
Antes
ne’e, Polísia Nasionál Timor Leste (PNTL) liuhosi Servisu Investigasaun
Kriminal Nasionál (SIKN) kaptura tiha ona australianu ida ho naran Antonio
Robertking, tanba kuda ai-horis droga Marijuana Kanabis iha área nia hela
fatin, iha sentru fornesimentu kombustivel Tiger Fuel.
Polísia
detekta antes ona foin halo kapturasaun iha loron Sesta, (14/10), iha Tiger
Fuel, BNCTL nia sorin.
“Ita
nia polísia detekta maka ba to’o iha sidadaun Austrália ne’e nia uma hodi kaptura
no lori ona ba iha Kuartel Jerál depois maka prosesu ba oin,” Komandante
Jerál PNTL, Komisáriu Júlio da Costa Hornay, informa ba
Jornalista iha Kuartel Jerál PNTL, Kaikoli, Sábadu (15/10).
Iha
kapturasaun ne’e polísia sita mos ai-horis droga marijuana hamutuk vazu hitu.
“Ita
konsidera kazu ne’e hanesan krimi. Liuhosi investigasauin klean maka ita foin
aprejenta ba tribunál hodi tuir prosesu julgamentu,” Hornay hatutan.(way)
Timor
Post
Sem comentários:
Enviar um comentário