DILI,
(ANTIL) – Primeiru Ministru, Rui Maria de Araujo iha nia abertura ba
Konferénsia Nasionál Auditoria Sosiál iha salaun Ministériu Negosiu Estranjeiru
no Koperasaun (MNEK), Kuarta, (19/10) hateten, sosiedade sívil nia papél
importante hodi kontrolu servisu governu liu-hosi modu auditoria sosiál.
“Auditoria
sosiál hanesan instrumentu ida oinsá mak sosiedade sívil no membru sosiedade
tomak bele hamutuk hodi haree kestaun balun ne’ebé mak sai problemátiku hanesan
merenda eskolár ne’ebé sai preokupasaun loron-loron ba públiku”, Primeiru
Ministru katak.
Xefe
Governu ne’e apela ba sosiedade sívil no parseiru dezenvolvimentu sira atu tau
atensaun ba mekanizmu no sistema servisu governu hodi bele kontribui ba
dinámiku entre sosiedade ho governu.
Governu
iha transparénsia atu esklarese buat barak kona-ba informasaun sira ne’ebé mak
iha relasaun oinsá mak bele halo auditoria sosiál, oinsá mak atu reforsa
auditoria sosiál iha TL hanesan komponente ne’ebé ho bo’a governasaun.
“Durante
ne’e ita sei rona problema barak maibé, governu nia objetivu mak servisu ho
parseiru dezenvolvimentu sira no organizasaun sosiedade sívil atu reforsa di’ak
liu tan bo’a governasaun”, katak tan.
Hosi
perspetiva governu, auditoria sosiál nu’udar fatin ida iha ne’ebé sosiedade ho
governu bele ko’alia ba malu, rona perspetiva ida-idak nian no hamutuk hodi
haree oinsá hametin efisiénsia no efikasia iha servisu hotu-hotu ne’ebé governu
estabelese.
Programa
prioridade sira mak iha setór edukasaun, saúde, agrikultura no infraestrutura,
hosi programa sira ne’e fó biban ba sosiedade sívil atu dezenvolve dalan, oinsá
mak atu partisipa auditoria sosiál hodi influénsia ba implementasaun programa
governu ho nia efikasia no efisiénsia. (jornalista: Zezito Silva; editora:
Rita Almeida)
Foto:
Primeiru Ministru, Rui Maria de Araújo hato’o diskursu kona-ba Auditoria Sosiál
ne’ebé mak durante ne’e sosiedade sívil halo bazeia ba nota entendimentu ho governu
iha MNEK, Kuarta, (19/10). Foto ANTIL/Egas Cristovão
Sem comentários:
Enviar um comentário