2016, ME Fó Ona Bolsa Estudu ba Timoroan Na’in 209

DILI, (ANTIL) - Ministériu Edukasaun fó ona bolsa estudu ba timoroan na’in 209, durante tinan 2016,  hodi estuda iha rai li’ur ba área oioin. Dadus ida ne’e fó sai husi Vise-Ministra Edukasaun I Asuntu Ensinu Pré-eskolár no Báziku, Dulce de Jesus, hafoin despede ho bolseiru sira ne’ebé atu ba estudu iha Universidade Sabbah, Malázia no Universidade Tailándia, iha Ministériu Edukasaun, Vila verde, Díli, Sesta (18/11).

 Entre bolseiru sira-ne’e, ema na’in 163 ba iha nasaun sira hanesan Malázia, Tailándia, Filipina, Portugal, Cabo Verde nomós Moçambique. ” Ita fó bolsa kompletu, nune’e mós bolsa parsiál, katak ita selu de’it sira nia billete, fundasaun ruma ka ajénsia ruma mak selu sira (bolseiru) nia estudu,” informa Vise-Ministra Edukasaun I ne’e.

Bolseiru ikus ne’ebe despede iha Sesta liuba, hamutuk ema na’in 23 kompostu husi na’in 15 hodi ba kontinua sira nia estudu iha Malázia, Universidade Sabbah, na’in hitu ba halo sira nia mestradu iha Tailándia no ida atu halo doutoramentu.

Bolseiru sira ne’ebé estuda iha Malázia, foti area oioin hanesan, disiplina inglés, matematika, psikolojia nomós siénsia mariña inklui enjenária. “Ita espera katak, estudante sira ne’ebé Governu Timor-Leste fó bolsu estudu, bele hala’o sira-nia kna’ar ho di’ak, kumpre regra sira ne’ebé ita hatuur tiha ona,” vise ministra edukasaun dehan.

ME kontinua manten kooperasaun di’ak ho universidade sira iha rai liur, inklui universidade sira-ne’ebé mak Timor-Leste seidauk iha adidu edukasaun ka asistente adidu edukasaun no nasaun sira ne’ebé seidauk iha embaixada Timor-Leste, hodi kontinua halo ligasaun ho universidade.

Kona-ba tempu estudu ba bolseiru sira, Vise-Ministra Edukasaun Asuntu Ensinu Pré-eskolár no Báziku, Dulce de Jesus informa, ME sei ajusta ho regra universidade sira nian, katak, balun bele hakotu sira-nia kursu iha tinan tolu nia laran, tinan haat nomós tinan lima no balun bele liutan. “Ita ajusta ho regra ne’ebé aplika iha universidade idaidak,” nia afirma.

Kona-ba futuru hafoin remata estudu, Vise Ministra dehan, Governu Timor-Leste fó oportunidade ba timoroan ne’ebe iha kapasidade atu kontinua estudu. Hafoin remata estudu, nia hatutan, idaidak iha   responsabilidade atu kria serbisu ka haforsa sira-nia an. Tanba  Governu la promete atu bainhira remata estudu, Governu simu sira hotu serbisu iha instituisuan Governu.

Maske nune’e, Governu la husik responsabilidade. “ Governu iha nafatin komitmentu, katak, atu simu sira hothotu ba serbisu iha instituisaun ba governu. Ita espera katak, ema ne’ebé mai ho abilidade, nia sei ajuda Governu atu mellhora liutan situasaun rai laran,@ Vise ministra dehan tan.

Serimónia despedida bolseiru sira, partisipa direta husi embaixadora Malázia ba Timor-Leste, Citra Devi A.Pramiah no Embaixadór Tailándia, Patchanee kithavorn inklui inan-aman ka familia husi bolseiru sira. (Jornalista:Rafy Belo/Editór: Otelio Ote)

Foto: Vise-ministra Edukasaun I, Dulce de Jesus