DESKONFIA EMILIA PIRES HALAI, PN HUSU DEFEZA RESPONSABILIZA

Reprezentante povu iha Parlamentu Nasional (PN), husu ba parte defeza husi arguida eis Ministra Finansas, Emilia Pires nian tenki iha responsabilidade ho atitude arguida  nian ne’ebé deskonfia halai ba mai husi Australia ba Portugal.

Tuir Xefi bankada Partidu Demokratiku (PD), Maria Lourdes Bessa, katak, peokupasaun ne’e hot-hotu nian, tanba ne’e maka husu defeza atu toma responsabilidade lalais hodi nune’e labele hamosu diskriminasaun.

“Ne’e preokupasaun ita hotu ninian no responsabilidade ita hotu nian liu-liu orgaun ne’ebé responsabilidade ba kestaun ida ne’e, tantu husi Governu, Tribunal nune’e mos arguido rasik. Mas kuandu nia halai ne’e responsabilidade Defeza nian, ne’ebé ami hein prosesu ne’e bele la’o hodi nune’e labele hamosu diskriminasaun iha sistema justisa,”hatete Maria Lourdes Bessa ba Jornalista sira iha PN, Sesta (18/11/2016).

Iha fatin hanesan, Xefi Bankada Frenti-Mudança (FM), José Luis Guterres, garante katak, arguida Emilia Pires sei la halai dok, tanba Estadu Timor Leste iha kooperasaun diak ho nasaun viziñu sira liu husi Interpol (International Police).

“Ha’u fiar katak Emilia Pires sei fila, tanba nia moras diak ona. Ha’u hatene tanba ha’u la’os nia advogadu, maibe uluk ami servisu hamutuk katak nia iha aten brani para fila mai hasoru justisa. Ita nu’udar eis Governante ka sidadaun normal ida ita labele aas liu fali lei, perante justisa ita hotu hanesan,”dehan nia.

Jos’e Luis Guterres dehan katak, diak liu arguida Emilia Pires koopera deit ho justisa, nune’e bele hatudu ba povu katak justisa ne’e vale ba ema hotu.

Antes ne’e, tuir Advogadu Privadu, arguida eis Ministra Finansas, Emilia Pires nian, José Pedro Camões, hatete, nia kliente ba halo tratamentu saude iha Australia no nia kontinua ba Portugal hodi haree diak liu tan ba nia saude ne’e. José Pedro Camões, hatete katak, nia kliente sei koopera nafatin ho justisa.

Kazu ne’ebé komete husi arguida eis Ministra Finansas, Emilia Pires ho eis Vise Ministra Saúde, Madalena Hanjam, kona-ba deskonfia halo korupsaun bainhira sosa kama ba Hospital sira iha Timor-Leste.mia

Jornal Nacional