LAIHA KOORDENASAUN, IMPAKTU BA KUALIDADE PROJETU

Xefi delegasaun Komisaun Eventual (KE), Parlamentu Nasional (PN), atual deputadu Manuel Castro, hatete, liña koordenasaun husi reprezentante Ministeriu Obras Publikus, Transportes no Komunikasoens (MOPTK), Munisípiu Ermera, ho tekniku Ajensia Dezemvolvimentu Nasional (ADN) no mos kompañia nain durante implementa projetu iha Munisípiu Ermera rasik la dun diak, fo impaktu direta ba kualidade projetu.

“Ha’u hanoin sira presiza hadia serbisu ne’e ho diak, importante liu maka koordenasaun, tanba realidade hau haree iha terenu husu ba reprezentante MOPTK katak kompañia se mak kaer obra ne’e sira rasik mos lahatene, nune’e mos ba tekniku ADN nian,”hateten xefi delegasaun ba monitorizasaun dividas Estado ne’e wainhira tun direta ba fiskalizasaun iha Munisípiu Ermera, Kinta (17/11/2016).

Tanba ne’e, tuir reprezentante povu husi bankada FRETILIN ne’e katak, kuandu laiha liña koodernasaun diak entre parte sira ne’e hotu maka impaktu tebes ba iha kualidade projetu sira ne’ebé mak implementa.

“Ha’u husu ba liman ain Governu nian iha terenu atu hametin relasaun diak liu tan hodi nune’e bele kontrolu projetu sira ne’ebé mak implementa iha munisipiu Ermera rasik,”dehan Manuel Castro.

Tuir deputadu Manuel Castro katak, wainhira Komisaun Eventual tun ba halo fiskalizasaun iha Munisipiu Ermera rasik nota katak, projetu rehabilitasaun estrada husi Ermera Antiga mai Postu Administrativu ne’ebé mak kaer husi kompañia Suai Indah ninia durasaun tempu kleur tebes ona, maibe seidauk finaliza, ne’e tanba laiha kontrolu masimu husi Governu no ADN sira.

“Kona ba projetu Ponte liga ba Ermera-Hatulia mos hanesan, husu ba Governu atu gare duduaj dezenho ne’ebé mak iha, ami hare la’os dezeho, maibe hanesan esbosu ida deit, laiha asinatura husi instituisaun nein ADN mos la fo verifikasaun ida, tanba ne’e maka ami husu responsabilidade Governu nian,”kestiona Castro.

Iha fatin hanesan, Koordenador ADN, Munisipiu Ermera, Joaquim da S. Pinto dehan katak, durante ne’e sira iha koordenasaun diak.

“Ami durante ne’e sempre iha linha koordenasaun diak entre reprezentante Governu nian iha Munisipiu Ermera rasik nune’e mos kompañia sira ne’ebé mak kaer projeto rasik, realidade wainhira ami simu relatoriu hodi tun mai iha terenu atu verifika iha mudansa entre relatoriu ho iha terenu, kuandu ida ne’e akontese maka ami foti kedas medidas,”klarifika Koordenador ADN Munisípiu Ermera.

Nia dehan, tanba ho liña koordenasaun diak maka durante ne’e tekniku ADN nian sobu ona projetu lubuk ida ne’ebé mak implementa husi kompañia sira laiha kualidade no mos balu la tuir dezeñu ne’ebé mak iha ona.

Tuir observasaun JNDiário nian bainhira akompaña KE halo fiskalizasaun ba iha projetu emerjensia ne’ebé mak hamosu dividas iha Munisípiu Ermera nota katak, liña koordenasaun entre reprezentante MOPTK, ADN no kompañia sira menus tebes, tanba realidade delegasaun KE nian husu informasaun relasiona ho projetu sira ne’ebé mak iha difisil sira atu esplika, pior liu tan maka Governu nia razaun ketak, ADN nian ketak nune’e mos kompañia. Entretantu, ekipa ba fiskalizasaun ne’e mai husi Deputadu Manuel Castro hanesan xefi delegasaun no deputadu José Luis Guterres, akompaña ho tekniku komisaun ninian. Durante fiskalizasaun akompaña mos husi repezentante MOPTK, nune’e mos tekniku ADN nian.mia

Jornal Nacional