MARIA ANGELICA: GOVERNU GASTA ONA OJE US$ 11 BILOENS

Hahú husi Primeiru Governu to’o Sesto Governu konstitusionál ne’e, gasta ona Orsamentu Jeral Estadu (OJE) US$ 11 biloens. No husi total Orsamentu ne’e, US$ 8 biloens mai husi fundu minarai nian, fundos naun petroliferu no apoiu doadores.

“Governu la’os gasta de’it osan US$ 8 biloens, maibé tuir Parlamentu nia hatene, Governu gasta ona osan hamutuk US$ 11 biloens”, hateten deputada bankada FRETILIN Maria Angelica Rangel ba Jornal Nacional Diário, iha uma fukun Parlamentu Nasional (PN), Segunda (07/11) hodi responde ba pergunta Jornalista nian ne’ebé kestiona katak, Governu gasta ona orsamentu fundu minarai nian hamutuk US$ billoens atu halo dezenvolvimentu maibé dezenvolvimentu iha rai laran la hatudu rezultadu ne’ebé signifikativu.

Angelica Rangel hatutan katak, osan ne’e, barak mak Governu investe ba iha infraestrutura báziku, selu veteranu sira.

“Osan balu tama iha ita nia polítika edukasaun gratuitu, saúde gratuitu. Maibé ha’u hakarak dehan katak, nasaun ida ki’ik hanesan ita nian ne’e, presiza iha régras ne’ebé mak di’ak, atu nune’e buat hotu bele la’o ho di’ak,” dehan Maria Angelica Rangel.

Reprezentante povu husi bankada Partidu FRETILIN ne’e dehan tan, Governu iha duni régras, maibé membru Governu sira ladun implementa ho di’ak.

Iha fatin hanesan eis Vise Prezidenti Parlamentu Nasional (V-PN) Deputadu Adriano do Nascimento mós hateten katak, osan fundu petrolíferu ne’e, Governu gasta duni. Tanba ne’e iha buat balu nia rezultadu di’ak, maibé balu nia rezultadu ladi’ak.

“Ida ne’e ami nia sala mós hanesan deputadu, tuir loloos kuandu Governu aprezenta mai ne’e, ami tenki husu, estudu biabilidade iha ne’ebé, hamosu programa ida ne’e, nia utilizasaun halo nusa, ida ne’e sala ami nian,” dehan Adriano do Nascimento.

Adriano dehan, kontrolu Governu nian ba ezekusaun orsamentu ne’e, li-liu halo óbra ne’e nia kualidade halo nusa, no kontrolu implementasaun, li-liu ba óbra nia kualidade.

Maibé dehan Adriano do Nascimento, Parlamentu sempre krítika katak, ida ne’e no ida ne’ebá ladi’ak, maibé asaun Governu nian atu hadia ne’e mak problema.

“Osan ne’e sé ita ko’alia kona-ba númeru,  ita labele politiza, ha’u labele responde ita bo’ot nia pergunta ne’e, tanba sé ita ko’alia númeru ne’e, ita tenki responde ho númeru indeks sira ne’e,” katak Adriano.

Eis Vise Prezidenti Parlamentu Nasionál ne’e fó ezemplu katak, indeks ne’e hanesan, númeru ki’ak iha Timor Leste (TL) ne’e, sa’e ka tuun, no númeru rekursus humanus ne’e oinsa.

“Nomós Pendapatan Perkapita ne’e, aumenta ka oinsa, maibé ha’u la’os ema ekonómista, maibé ha’u ko’alia kona-ba kestaun polítika de’it. Ita iha osan, ita tenki gasta, no ita gasta tanba ita presiza,” afirma Adriano.

Adriano haktuir, Timor Leste (TL) ne’e, bainhira Indonesia sai, sunu husi rohan ba rohan, entaun hahú husi ne’ebá, tenki uza osan duni atu hadia buat hotu.

“Kestaun ba ha’u ne’e, la’os defini prioridade, iha parte balu progresu ne’e la’o hela no la’o di’ak hanesan Estrada, bee moos, eletrisidade,” esklarese Adriano.

Maibé Adriano dehan, iha parte balu kestaun polítika, definisaun prioridade ne’e mak presiza tenki tau atensaun maka’as.

Nia afirma, kestaun seluk mak kontrolu, tanba kontrolu ne’e iha buat barak, li-liu kontrolu de planeamentu laiha distrisaun.cos

Jornal Nacional