DILI,
(ANTIL) - Estudu ida iha tinan 2016 kona-ba impaktu dezenvolvimentu
sustentavel, hatudu Timor-Leste (TL) tuur iha sétimu lugar hanesan
país ne’ebé husi 2006-2014, konsege di’ak liu transforma kresimentu ekonómiku
ba povu nia moris di’ak, dehan relatóriu Fórum Ekonómiku Mundiál ne’ebé relata
husi Primeiru-Ministru (PM), Rui Maria de Araújo.
Aleinde
ne’e, relatóriu Fundu Monetáriu Internasionál mós hateten, tinan ida ne’,
TL nia ekonomia buras ho ritmu satisfatóriu.
“Maski
nafatin temi nesesidade atu diversifika ita-nia ekonomia, relatóriu ne’e haree
pozitivu tebes progresu ne’ebé halo ona iha reforma aduaneira no fiskál,
nu’udar dalan atu aumenta reseita doméstika”, PM dehan iha nia diskursu ba
aprezentasaun Orsamentu Jeral Estadu 2017 iha Parlamentu Nasionál, Kuarta
(23/11/2016).
Relatóriu
kona-ba ki’ak iha Timor-Leste, ne’ebé publika hudi Diresaun Jerál Estatístika
iha Setembru 2016, hatudu timoroan ne’ebé moris iha situasaun ki’ak tun husi
porsentu 50,4 iha 2007 ba 41,8 iha 2014.
“Revista
Lancest, revista sientífika medisina nian ho reputasaun mundiál ne’ebé
aas tebes, iha nia publikasaun iha fulan-Setembru tinan ida ne’e, kona-ba
peskiza ba metas 33 husi Objetivu Dezenvolvimentu Sstentavel (ODS),
ne’ebé relasionadu ho saúde iha 188 paízes, hateten, husi tinan 2000, progresu
absolute boot liu iha melloramentu indise ODS ne’ebé relasionadu ho saúde,
akontese iha TL, tuir kedas ho Butan no Kolumbia”, PM hateten.
Iha
TL melloramentu ne’e akontese, relasiona ho intervensaun hirak ne’ebé hala’o
iha ámbitu kuidadu saúde universál, tanba melloramentu iha bee-moos no
saneamentu nomós pás ho estabilidade.
“Iha
fulan kotuk, Banku Mundiál iha nia relatóriu trimestral hateten, investimentu
ne’ebé Timor-Leste hala’o iha infraestrutura nomós reforma ne’ebé hala’o, hahú
hatudu ona rezultadu. Sujere atu aplika rekursu finanseiru, hodi diversifika
ekonomia no garante sustentabilidade fiskál”, PM dehan. (Jornalista :
Maria Auxiliadora/Editor: Otelio Ote)
Foto:
Sistema hortikultura ne'ebe oras-ne'e introduz ba agrikultor sira, hodi hasae
produsaun no ajuda aumenta familia nia rendimentu ekonomia. Foto ANTIL/ Dok MAP
Sem comentários:
Enviar um comentário