PD Iha Prosesu Diside Nia Ema ba Kandidatu PR

DILI - Partidu Demokrátiku (PD), seidauk diside nia ema atu ba kandidatu Prezidente Repúblika (PR), períodu 2017-2022, tanba sei prepara uluk ba kongresu nasionál.

“Ami seidauk diside buat ida (kandidatu-red) tanba agora ami sei prepara an ba kongresu nasionál,”Prezidente Interino PD, Adriano do Nascimento informa ba jornalista sira iha Palásiu Prezidensiál, Tersa (13/12).

Nia hatutan, tuir planu kongresu nasionál ba partidu demokrátiku sei realiza iha loron 13 to’o 15 fulan Janeiru tinan 2017.

“Ami nia kongresu sei halo iha loron 13 to’o 15 fulan Janeiru,”nia esplika.

Nia dehan, iha kongresu ne’eba maka sei hola desizaun no mós kongresista sira fó hanoin maka lideransa toma desizaun hodi kandidatu PD ne’e avansa ka lae.

“Entertantu ate agora mós seidauk hili ema ruma atu sai prezidente partidu, tanba atu hili ema atu sai lideransa partidu ne’e presiza tuur hamutuk no kongresista no militante partidu iha hanoin maka hola desizaun ba lideransa partidu, tanba ida ne’e maka sei mosu iha kongresu nia laran hotu,”nia subliña.

Tuir nia, PD iha mós preukupa ba eleisaun jerál tinan oin mai ne’e tanba bele iha manipulasaun iha laran tanba manipulasaun ne’e iha oin-oin. Manipulasaun ne’e bele manipula iha terenu no bele mós iha komputadór.

“Iha komputadór ne’e ita bele aumenta mós númeru, no manipulasaun iha terenu ne’e ita bele iha sentru votasaun ne’e hatudu númeru ida mai nasionál hatudu seluk,”nia preukupa.

“Maibé PD espera katak situasaun ida hanesan ne’e labele akontese, no PD garante mós estabilidade sei la’o di’ak para hatudu dala ida tan ba mundu katak demokrásia iha Timor-Leste la’o di’ak,”nia garante. (mj1)

Timor Post