sexta-feira, 16 de dezembro de 2016

Polisia Prende Kareta Riben Metan no Uza Sticker

DILI: Polisia Nasionál Timor-Leste husi Unidade Tranzitu, Kuarta (14/12), hala’o operasaun ba kareta estadu no transporte públiku ne’ebé uza riben metan no sticker rebo-rebo.

Liu husi operasaun ne’ebé hala’o, Polisia konsege prende kareta 17 kompostu husi mikrolet 10, taxi 4, no bus 3.

Razaun polisia tranzitu halo operasaun ba kareta riben metan atu minimiza no evita problema ne’ebé dala-ruma akontese iha tempu kalan no balun tula feto ‘prostituta’ sira.

Aleinde riben, polisia mós halo operasaun ba transporte públiku ne’ebé uza sticker oioin, ne’ebé dala-ruma halo kondutór sira ladun kontrolu no haree di’ak estrada, ikus mai bele akontese asidente trafiku.

"Tanba ne’e, polisia tenke halo pasa revista no cheek riben sira ne’e,” informa Komandante Tranzitu Munisipiu Dili, Matias da Silva ba jornslista sira iha nia knar fatin, Kaikoli, Kuarta (14/12).

Iha loron dahuluk operasaun, nia dehan, polisia konsege prende kareta uza riben metan no balun uza sticker ne’ebé taka tomak vidru kareta nian.

"Operasaun kontinua la’o, liliu ba loron boot, atu bele hamenus kazu sira ne’ebé dala-barak akontese ", dehan Matias.

Ba kareta sira ne’ebé hetan prende, Matias dehan, nia parte fó karta prende (tilang) no na’in husi kareta tenke ba selu iha banku hafoin bele foti fila fali sira-nia kareta.

"Ami halo inspesaun ba sira-nia kareta, lees hotu riben sira ne’e no hasai hotu sticker sira ne’e mak ami bele entrega ba sira hodi hala’o sira-nia atividade," dehan Komandante ne’e. (*)

Pachar Malay – Ola Timor - Editór: Tellukoro

Foto: Polisia Tranzitu Munisipiu Dili prende mikrolet no taxi ne'ebe uza sticker oioin hodi taka vidru no kareta nia lolon. (olatimornews FOTO: Pachar Malay)

1 comentário:

Unknown disse...

Ita komprende itabot sira nian serbisu. Husu mos atu les hotu Riben kareta estadu sira hanesan membru parlamentu governu sira nian ne tenki les hotu. Kareta publiku ne bele les maibe ema nia kareta privadu mos itabot sira les hotu. Tau iha neon katak buat ne mos ema sosa tau ema nia kareta privadu laos estadu maka sosa lae !!!! Halo asaun tengki identifika lolos laos borong deit. Karik bele kria sistema maka forte hodi nune ema hotu bele kumpri. Oinsa ema bele kumpri total se itabot sira nian komandante balun uza vidru metan. Regras tengki ba ema hotu. Presiha iha koperasaun diak nune ema hotu ka publiku tomak hela ho haksolok. Bom trabalho