Prezidente Duterte mantén aprovasaun "di'ak tebes" ida hosi filipinu sira

Prezidente filipinu, Rodrigo Duterte, mantén índise ida aprovasaun nian ne'ebé "di'ak tebes", liutiha fulan neen hafoin simu pose ba kargu, períudu ida ne'ebé marka ho nia kampaña brutal hasoru droga, haktuir hosi sondajen ida ne'ebé publika ohin hosi imprensa lokal.

Sondajen hosi Social Weather Stations (SWS) fó ba Prezidente 63% hosi aprovasaun ba nia jestaun, pontu ida ki'ik duké bainhira nia simu pose iha fulan-Juñu, maibé sei tama iha klasifikasaun "di'ak tebes" ne'ebé maka konsultora fó.

Estudu hatudu diminuisaun hosi valorizasaun ba pontu 11 iha Mindano, illa ne'ebé situa iha súl ne'ebé hanesan Duterte nia rai moris fatin, maibé hanesan fatin ne'ebé Prezidente mantén nia nota di'ak, ho índise "excelente" hosi 74%.

Diminuisaun ne'e kompensa ho nota di'ak iha Manila - hosi 58 ba 59% - no iha fatin seluk iha illa Luzón, iha norte arkipélagu nain, ne'ebé maka iha aprovasaun hosi 57% ba 60%, tuir hosi sondajen ne'ebé haktuir hosi diáriu The Inquirer.

Sondajen ne'e hala'o entre loron 3 no 6 Dezembru, fulan neen hafoin Duterte simu tiha kargu no hahú nia kampaña violentu hasoru droga sira, ne'ebé hetan krítika hosi grupu sira ne'ebé defende direitu ema sira nian, hosi ONU no Uniaun Europeia, no hosi fatin sira seluk.

Kampaña ne'e halo ona ema na'in 5.900 resin mate, na'in 4.000 mate iha ezekusaun estrajudisial sira hafoin Duterte hatete beibeik iha okaziaun oioin ba polísia sira no mós ba sidadaun sira hodi oho ema drogadu sira no trafikante sira ne'ebé sira koñese.

SAPO TL ho Lusa