Infraestrutura-Bázika Timor-Leste Sei Sai Problema Boot

DILI (ANTIL) - Primeiru-Ministru (PM), Rui Maria de Araújo rekoñese katak, Timor-Leste oras ne’e daudaun sei infrenta problema iha área infraestrutura-Bázika, tuir rejultadu piskiza Centre For Insight in Survey Research.

“Estrada, Empregu ho edukasaun sai problema boot iha Timor-Leste,” Primeiru-Ministru, Rui Maria de Araújo relata asuntu ne’e ba jornalista sira, iha Palásiu Governu, Tersa (03/01).

Xefi  Governu ne’e esplika tan katak, rejultadu peskiza nasionál kona-ba opiniaun públiku iha Timor-Leste ne’ebé hala’o hosi Centre For Insight in Survey Research, Novembru 7-24, 2016 hatete katak, problema ne’ebé mak Timor-Leste hasoru dadaun mak hanesan Estrada 29% (2016) 25% (2013) 16% (2008) Empregu 11% (2016) 8% (2013) 10% (2008) Edukasaun 8% (2016) 9% (2013) 33% (2008) Krimi 7% (2016) 4% (2013) 1% (2008) Eletrisidade 5% (2016) 8% (2013) 7% (2008) Violensia politika 4% (2016) 1% (2013) 0% (2008) Relasaun governu ho nasaun vizinu sira 4% (2016) 1% (2013) 1% (2008) Presu aihan no sasan sira 3% (2016) 5% (2013) 6% (2008).

Lei kona-ba Nain ba rai nian 2% (2016) 1% (2013) 1% (2008) Korupsaun ne’ebé relasaun iha estadu laran 2% (2016) 3% (2013) 1% (2008) Gastus ba pensaun veteran 1% (2016) 1% (2013) 1% (2008) Sistema kuida saúde 1% (2016) 4% (2013) 5% (2008) Sistema justiza 1% (2016) 1% (2013) 1% (2008) Dezenvolve turismu.

PM Rui mós salienta, haree ba problema hirak ne’e mak polítika Governu Konstitusionál VI,  konsentra nia program ba komponenti sira hanesan, reforma ekonómika, reforma fiskál, reforma administrasaun públika no setór justisa.

Governu  Konstitusionál VImós iha tinan ida ne’e sei organiza eleisaun inportante rua hanesan eleisaun Prezidensiál no lejislativu, hodi nune’e bele rejulta governasaun ida nebé lejitimu hodi kontinua hala’o prosesu dezenvolvimentu tinan liman ba oin (2017-202).

Rejultadu piskiza Centre For Insight in Survey Research, hatudu katak, antuziasmu populasaun hodi vota iha eleisaun 2017 rua ne’ebé mak sei mai atinji kuaze 98%.

Entretantu polítika alokasaun orsamentu hosi  Governu Konstitusionál VI, iha orsamentu jerál  estadu 2017 ba área infraestrutura fíziku hamutuk tokon $.549, 40% hosi totál Orsamerntu Jerál estadu 2017  $. 1.414,4 milhoens. (Jornalista: Manuel Pinto / Editor: Alberto Alves)