Ramos Horta Kesi Bandeira Amérika Ba Kareta hanesan enfeita ka Halimar

DILI (ANTIL) - Eis Prezidenti  Repúblika, Dr. José Ramos Horta klarifika katak nia kesi bandeira Estadus Unidus Amérika ba ninia kareta privadu ho marka Jeep ne´e hanesan enfeita deit ka halimar nian.

“Ne´e halimar de´it,” Horta dehan ba jornalista sira iha Palásiu Prezidénsia Repúblika, Bairu-Pité, Dili, foin lalais ne´e, hafoin ramata inkontru ho atuál Prezidenti Repúblika, Taur Matan Ruak.

Premiadu Nobel ba Páz informa katak iha Amérika ne´ebá, ema la liga liu bainhira kesi bandeira iha fatin ne´ebé de´it, tanba amerikanu sira hatene katak ne´e enfeita ka halimar nian.  “Amerikanu sira la fó importánsia ba ida ne´e,” nia hatutan.

Horta hateten nia la kesi bandeira RDTL ba ninia kareta tanba lei bandu. Tuir lei katak úniku Prezidenti Repúblika de´it maka bele kesi bandeira iha kareta nia ulun. Kareta ne´e, nia haktuir, uluk koor kinur no sosa hosi siñor ida naran Ahmad Alkatiri. Hafoin sosa maka nia pinta ba koor matak hanesan militár Amérika sira nia kareta funu. (Jornalista: Xisto Freitas / Editor: Alberto Alves)

Imajen dok. Dr. José Ramos Horta