Formasaun Lian Portugues Ba Professores La Justu

DILI - Formasaun lian portugues neebe mak durante nee halao husi professor sira nee ladun justu, tanba tempu ba formasaun nee limitadu tebes ba sira, hodi hatoo sira nian preokupasaun ruma ba formasaun refere.

Tuir koordenador EBF Fatumeta, Flaviano da Costa de Jesus dos Santos dehan, maske Timor Leste (TL) ninia lian ofisial mak tetum no portugues, maibe oinsa mak ba oin nee atu dezenvolve diak liu tan lian ida nee ba oin, tanba too agora formasaun lian portugues ba professor sira nee sei limitadu tebes, entaun oinsa mak atu muda sistema formasaun ida nee, atu nunee professor bele kompriende diak liu tan lian refere.

Hau hanoin konaba formasaun lian portugues ba professor sira nee, hau haree iha primeiru governu planu neebe mak lao, liu-liu ita nian konstituisaun nee ba eskrita tiha ona katak, ita nian lian ofisial mak tetum no portugues, iha momentu nee ba professor sira iha antusiasmu tebes, oinsa mak atu bele kompriende no hatene lian Indonesia, maibe too mai agora, mudansa de tempu no curriculum iha tinan 2012-2013, iha ona curriculum foun neebe mak iha,”hatete  Flaviano ba STL  iha nian knar fatin Fatumeta, Dili, Tersa (22/08/2017).

Nia hatete, agora professor sira hahu koalia no kumpriende lian portugues, maibe konaba tempu ba formasaun nee ladun justu, tanba professor sira hamutuk para atu haree difikuldade neebe mak professor ida-idak infrenta iha sira nian atividades ensinu aprendizajen.

Hau nian hanoin ba governu foun neebe mak mai atu bele tau matan diak liu tan ba iha area edukasaun, liu-liu Ministeriu Edukasaun (ME), atu bele implementa buat neebe mak bele lori ita nian oan sira, no oinsa mak ita nian professor sira bele iha kapasidade ida neebe mak aas, atu nunee bele eduka diak liu tan ita nian estudante sira,”dehan nia.

Iha parte seluk, Santiago Valente Xavier, hanesan professor iha eskola sekundariu novel da  paz, hatete, konaba lian portugues, sira sente rilematis tebes, tanba ema hotu  hatene katak, iha lei hatete tiha ona katak, lian ofisial mak tetum no portugues, maibe  haree rilematis tebes, tanba agora lian nee adopa husi lian Indonesia, portugues no tetum, maibe hanesan professor sira  esforsu aan nafatin atu hatene lian portugues, tanba professor tenke hanorin ho portugues, entaun oinsa mak sira tenke obriga aan, para atu hatene lian portugues.

“Konaba lian portugues, ami sente rilematis tebes, tanba ita hatene katak, iha ita nian lei hatete tiha  ona katak, lian ofisial mak tetum no portugues, maibe ita haree rilematis tebes, tanba agora lian nee adopa husi lian Indonesia, portugues  no tetum, maibe ba  ami nee  esforsu aan nafatin atu hatene lian portugues, tanba ami professor tenke hanorin ho portugues, entaun ami tenke obriga aan, para atu hatene lian portugues, maibe laos atu hatene seim pursentu, mais ou menus neneik, tanba ami iha obrigasaun atu hatene, tuir hau nian observasaun  hau haree, ba estudante sira mos dala ruma problema barak iha lian, tanba sira adopta ho lian, liu-liu konaba lian Indonesia ninia,”tenik nia.

Jacinta Sequeira | Suara Timor Lorosae