Jerasaun Tuan Hahu Perpara Tranzisaun

DILI - Timor Leste oras nee dadaun bele dehan tama ona ba faza tranzisaun jerasional husi jerasaun tuan ba jerasaun foun liu-liu perpara jerasaun foun sira iha tinan 2022.

Tuir Vise Prezidente Fretilin, Fransisco Miranda Branco, ba STL iha uma fukun Parlamentu Nasional (PN) Kinta (24/08/2017) hatete, husi jerasaun nebe maka dirije luta, fundador sira sei hamutuk tanba, tinan 5 nia laran nee mandatu ikus ba jerasaun tuan sira atu halo preparasaun ba tranzisaun jerasional ba jerasaun foun, apartir de 2022.

“Tanba nee hanesan ema nebe dirije luta, purtantu importante prezensa historiku, Kay Rala Xanana Gusmao, Mari Alkatiri, Prezidente Lu-Olo, Ramos Horta no Taur Matan Ruak, iha momentu nebe tama iha jerasaun tranzisional,” dehan Branco.

Tanba nee, atu entrega ba jerasaun foun sira Fretilin sei la des akredita Kay Rala Xanana Gusmao, nebe maka oras nee dadaun luta ba fronteira maritima hanesan luta ba soberania nasional povu Timor Leste tomak nian.

Branco hatutan, konaba polemika tomada depose ba membru PN kuatru lejislatura neebe mak adia nee kestaun politika tanba sei hein Xefe negosiador fronteira maritime Xanana Gusmao neebe mak oras nee dadaun sei iha hela estranjeiru hodi luta ba direitu TL nian.

Iha parte seluk observador politika UNTL, Camilo Ximenes hateten, nia parte haree katak iha politiku kontemporaneu la iha fatin tanba, se mak atu asumi kargu politiku atraves liu husi eleisaun. Tanba nee eziste partidu politiku para halo selesaun ba nia kuadrus politiku sira inklui jerasaun foun sira atu hatutan rota lideransa nee, kuando lider tuan sira labele ona.

“Mesmu nunee iha demokrasia laiha faze ikus no fase foun maibe iha deit interese atu hetan poder no defende poder nebe iha ona, tanba nee laiha razaun fundamental atu defende maibe jerasaun foun sira konsidera sira nudar fundador ba nasaun ida nee ita apresia no louva,” dehan Camilo.

EST2 | Suara Timor Lorosae