Empreza agríkola rua timoroan nian simu Prémiu Esportasaun 2017 nian

Empreza agríkola rua maka sai hanesan vensedór hosi edisaun dahuluk hosi Prémiu Esportasaun Timor-Leste nian ne'ebé entrega iha findesemana ne'e hosi Ajénsia Governamental ba Investimentu no Promosaun Esportasaun nian, TradeInvest Timor-Leste (TITL).

Premiadu sira maka Outspan Agro Timor, ne'ebé simu prémiu hanesan "esportador ezistente tinan nian", no empreza Nova Casa Fresca, ne'ebé rekoñesidu hanesan "potensial esportador tinan nian", informa hosi TradeInvest.

Iha komunikadu, entidade esplika ona katak aprezenta ona ba prémiu sira empreza hamutuk sanulu resin, no vensedór sira hili hosi júri ida ne'ebé forma hosi reprezentante sira hosi Kámara Komérsiu no Indústria Timor-Leste nian (CCI-TL), hosi Institutu Dezenvolvimentu hosi Área Privadu nian (IADE) no hosi Fasilidade ba Dezenvolvimentu Merkadu nian (MDF).

Ministru Agrikultura ho Peska timoroan nian, Estanislau da Silva, felisita ona atribuisaun ba prémiu sira ne'e, hodi konsidera katak hanesan importante "fó onra no fó korajen ba área privadu iha nasaun hodi investe no esporta produtu sira Timor-Leste nian".

Nia afirma katak área privadu hanesan importante ba "dezenvolvimentu sosial ho ekonómiku Timor-Leste nian".

Prémiu sira Esportasaun nian, ne'ebé sei sai hanesan eventu anual ida, hakarak rekoñese knaar ne'ebé sei hanesan área ki'ik ida hosi asaun ekonómiku, ho kafé maka domina oituan iha Timor-Leste hodi fa'an ba estranjeiru.

Emprezáriu nasional sira ho internasional sira hamutuk atus resin no reprezentante sira hosi entidade públika no privadu sira maka partisipa iha eventu ne'e.

SAPO TL ho Lusa