PN Sei Dada Hotu Kareta Prado, Aniceto: Hasai Desizaun Ba Alineasaun Foun

DILI - Parlamentu Nasional (PN) liu husi konsellu administrasaun hasai ona desizaun atu halo alineasaun foun ba kareta prado III lejislatura uza. Tanba nee PN sei buka meius dada hotu kedas parado 65 neebe eis deputadu sira uza.

Informa Prezidente Parlamentu Nasional Aniceto Guterres katak, apresiasaun ida husi plenaria, nudar prezidente nia submete ba iha plenaria, desizaun konsellu administrasaun nian, atu hetan apresiasaun husi plenaria PN nian.

Embora laiha deliberasaun, komfirma ba iha desizaun konsellu administrasaun, sira hotu iha apresiasaun katak desizaun nee tenke kumpri i fo reponsabilidade ba meza PN, hamutuk ho administrasaun atu implementa desizaun, implementa ho rigor hodi dignifika PN.

Tanba nee bainhira kareta sira nee hatama hotu ona sei halo fali apresiasaun ba alineasaun foun. I too agora dadaun kareta 20 resin mak hatama ona balu seidauk.

“Desizaun neebe konsellu administrasaun hasai nee importante mak atu halo alineasaun ba kareta tuan, maibe ho presu neebe justu tuir lei neebe mak iha. Maibe PN seidauk iha rejime espesial kona ba alineasaun, neebe alineasaun nee sei lao tuir rejime jeral iha estadu tomak nian. Hanesan mos kalkulu ba presu sei lao tuir rejime,” katak Aniceto ba Jornalista Tersa (03/10/2017) iha PN.

Aleinde nee mos inklui sosa kareta foun, maibe sosa kareta foun laos desizaun foun, tanba iha lejislatura anterior orsamentu nee iha kedas ona, i orsamentu nee sai tiha ona lei OJE neebe aprova iha 2016.

Kareta sira neebe eis deputadu sira uza balu hatama ona, balu seidauk, dalaruma sira iha razaun ruma. Maibe prosesu dada kareta sira husi sekretariu jeral PN nian, hasai ona karta para atu entrega hotu.

Iha fatin hanesan Xefi bankada Fretilin Francisco Branco hatete, horsehik konsellu administrasaun hasai ona sira nia desizaun, i konsellu administrasaun nee reprezante deputadu sira hotu husi bankada 5. 

Guilhermina Franco | Suara Timor Lorosae