Branco: Konstituisaun laiha Orsamentu Tranjitoriu

DILI – Laiha fatin ba Oposizaun Maioria Parlamentar (CNRT, PLP no Khunto), atu avansa projetu de lei tranjitoriu, tanba Konstituisaun RDTL laiha Orsamentu tranjitoriu.

Xefi bankada Fretilin Francisco Miranda Branco hateten, Anunsiu neebe horseik anunsia husi oposizaun katak sei avansa projetu de lei tranjitoriu nee lalos, tanba konstituisaun RDTL laiha orsamentu tranjitoriu.

Ita hare katak depois oposizaun vota kontra orsamentu Ratefikativu agora Estadu nia situasaun ekonomia bele tama resesu, tanba tuir Ministru Finansas hateten tenke iha injensaun signifika minimu sein miloens para labele tama iha resesu neebe sira mos hanoin ona atu avansa projetu de lei orsamentu tranjitoriu, maibe iha konstituisaun lahateten ida nee,” dehan deputadu Branco, ba jornalista sira iha PN, Dili, Kinta (21/12/2017).

Xefi bankada nee hateten, Konstituisaun hateten dehan kolia ba orsamentu nee poder ekluzivu husi Governu nian, Parlamentu so inisiativa ba alterasaun lei de jestaun finanseira bele, maibe buat hotu hotu kolia konaba orsamentu nee lei nee so bele inisiativa husi Governu deit atu informa deit hanesan nee para labele mosu presepsaun iha publiku.

Iha fatin hanesan Xefi bankada PLP Fidelis Magalhaes hateten, Oposizaun lahalo proposta orsamentu, halo proposta ba lei ida ba rejimi especial tranjitoriu, tanba presiza lei nee maka bele hatun osan para auguenta hela dua desimu fulan ida ka rua, tuir mai para Estadu bele iha osan nunee bele asegura funsionamentu.

Entretantu Ministru Planu e Finansas Rui Gomes hateten, Atu respeita kontratu nebe maka governu halo kontratu ona jeralmente kontempla ona orsamentu hodi halo pagamentus, ho atraza nebe iha sei uza duadesimu hodi gasta, no nia implementasaun sei too OJE tama iha vigor. 

Carme Ximenes/Maria Lay | Suara Timor Lorosae

Imajen: Francisco Branco, iha Tafara.tl/Google