DILI, (TATOLI) – Partidu
Kongresu Nasionál Rekonstrusaun Timor (CNRT-sigla portugés), Partidu
Libertasaun Nasionál no Kmanek Haburas Unidade Nasionál Timor Oan (KHUNTO) ho
naran Aliansa Mudansa ba Progressu (AMP) asina momerandu atu sai pakote úniku
hasoru Eleisaun Antesipada (EA).
“Ita iha ona kadeira 35 hosi
partidu tolu ne’e, maibé tenke servisu maka’as liután hodi aumenta iha eleisaun
antesipada”, dehan portavós AMP, Taur Matan Ruak, iha otel Novu Turizmu
Lecidere, kinta (1/2).
Prezidente PLP ne’e husu ba
lideransa nasionál, munisipál, suku no aldeia atu servisu maka’as hodi AMP bele
manan iha festa demokrásia 2018.
“Ha’u orienta mak ita tenke
servisu maka’as, enkuantu ita hakarak manan, se ita lakon di’ak liu partidu
tolu bele fahe malu de’it”, katak.
Matan Ruak liuhosi lideransa
partidu tolu nian informa ba inan-aman sira katak nain rua hanesan Kay Rala
Xanana Gusmão ho Taur Matan Ruak ne’ebé uluk terus hamutuk durante tinan 24
agora hamutuk fali ona.
Nune’e husu ba povu katak labele
fiar propaganda ne’ebé mak adversáriu sira halo iha fatin-fatin.
Nia akresenta tenke esforsu
servisu maka’as, halo sakrifísiu hodi aprosima eleitór hirak ne’ebé foin dadauk
la tuir eleisaun hamutuk 20.000 atu bele fó votu ba AMP.
“Ita nia kontribuisaun nu’udar
sidadaun di’ak mak ba vota, labele lakon oportunidade no tenke ezerse imi nia
direitu nu’udar sidadaun”, dehan.
Enkuantu programa ba AMP nian
to’o tempu mak foin hateten tanba tempu sei iha.
Iha fatin hanesan, Sekretáriu
Jerál partidu CNRT, dehan tempu badak Kay Rala Xanana Gusmão sei to’o
Timor-Leste.
Entretantu, Konselleiru Superiór
partidu Khunto, Naimori Bucar, afirma AMP tenke servisu maka’as liután atu
manan iha eleisaun tanba Kay Rala Xanana Gusmão ho Taur Matan Ruak hamutuk,
tenke esforsu servisu hamutuk iha baze to’o nivél nasionál tanba lakohi hatun
dignidade hosi rezisténsia nain ruan nian tanba uluk povu hamutuk ho sira rua
no seluk tan no agora hamutuk tan dala ida hodi atinje objetivu.
Jornalista: Zezito Silva | Editora:
Rita Almeida
Imajen: Sekretáriu Jerál partidu
CNRT, Prezidente PLP, no Konselleru partidu KHUNTO hatudu nota plataforma
ne’ebé asina iha otel Novu Turizmu, kinta, (1/2) hodi hamutuk hakat ba eleisaun
antesipada. Foto Egas Cristovão
Sem comentários:
Enviar um comentário