Komunikadu Imprensa
Fundasaun Mahein (FM), 31 Janeiru
2018
Iha loron 23 Janeiru 2018 susesu
boot operasaun autoridade seguransa sira nian ne’ebé lidera husi Polísia
Nasional Timor-Leste (PNTL) – Unidade Polísia Marítima (UPM). Prende kontentor
9 ne’ebé kontein matéria prima hanesan Parcetamol 5767 Kgs, Allupurinol 5500
Kgs no Piroxicam 2138 Kgs ho totál hamutuk 13405 Kgs ne’ebé importa husi empreza
Naroman Furak Unipessoal Lda.
Kontentor hirak ne’e tama iha
Portu Dili desde fulan Agustu to’o Novembru 2017 no entre kontentor hirak ne’e
tama iha fulan ne’ebé la hanesan. Nune’e mos husi kontentor 9 ne’e, 7 husi
Singapura tama direita mai Timor-Leste no kontentor 2 seluk transit iha
Surabaya, Indonézia depois mai Timor-Leste.
Bainhira kontentor 9 to’o iha
Portu Dili no iha Alfândega nia kontrolu involve mos Ministériu Saúde no parte
relevante sira hodi halo fiskalizasaun hodi konfirma kona-bá sasán hirak ne’ebé
iha kontentor 9 nia laran. Purtantu sasán hirak ne’ebé iha kontentor 9 nia
laran hanesan matéria prima hodi produs aimoruk ka medikamentu iha Timor-Leste.
Ikus mai empreza Naroman Furak Unipessoal Lda hato’o fila-fali pedidu ba
Alfândega hodi halo exportasaun ba Indonézia tamba Timor-Leste seidauk iha
fabrik hodi produs aimoruk. Nune’e mos bainhira UPM-PNTL prende sasán husi
kontentor 9 ne’e nian kaptura mos sidadaun Indonézia na’in rua ne’ebé mai simu
sasán husi kontentor 9 ne’e iha Portu Dili.
Husi ne’e hamosu dúvida barak
kona-bá kontentor 9 ne’ebé to’o deit iha Portu Dili. Tambasa tenke to’o tiha
Timor-Leste hafoin exporta fila fali ba Indonézia? Serake empreza Indonézia
sira nian labele importa no tenke liu husi Timor-Leste hafoin bele tama
Indonézia? Ka materia prima ne’e hanesan sasan ne’ebé proibidu tama iha
Indonézia nune’e utiliza Timor-Leste hanesan fatin transit hodi ba Indonézia?Se
maka sidadaun Indonézia na’in rua ne’ebé mai simu sasan iha Timor-Leste?
Relatóriu prelimenariu husi
autoridade seguransa hato’o katak materia prima ne’ebé iha kontentor 9 nia
laran konfirmadu ona katak hanesan materia primahodi halo aimoruk PCC
(Paracetamol, Caffeine, Carisoprodol) no tipu droga sira seluk. Tamba Indonézia
kontrolu rigorozu tebe-tebes kona-bá aimoruk PCC ne’ebé fo impaktu maka’as ba
konsumedor sira ne’ebé la ho rekomendasaun médiku nian. Entau susar tebes sasan
hirak ne’e tama direta ba Indonézia.
Nune’e utiliza Timor-Leste
hanesan fatin distinasaun ba sasan husi kontentor 9 ne’e hafoin exporta
fila-fali ho meius ne’ebé posivel bele tama iha Indonézia. Portantu sasán husi
kontentor 9 ne’e atu sai husi Portu Dili la tula ona iha kontentor no ho ró
ne’ebé propriu tula kontentor nian maibe hatun hotu sasán husi kontentor 9 ne’e
no tula fila-fali ba ró kiik ida.
Meius sira nune’e bain-bain
utiliza husi grupu krime organizadu sira bainhira sira haree katak dalan ida
ne’ebé sira bele utiliza no fasil hodi tama-sai hodi to’o iha distinasaun
lolos. Timor-Leste hetan akuzasaun bebeik ona katak hanesan dalan ne’ebé seguru
liu ba movimentu grupu krime organizadu sira nian ka fatin transit hodi hakat
ba Indonézia. Iha kazu kontentor 9 nian ne’ebé kontein materia prima produs PCC
husi Singapura direta mai Timor-Leste hafoin exporta fila-fali ba Indonézia.
Ne’e modus ne’ebé utiliza husi grupu krime organizadu sira!
Prátika sira nune’e bele prova
iha sidadaun Indonézia na’in rua ne’ebé mai simu sasán husi kontentor 9 ne’e
nian. Relatóriu preliminariu autoridade seguransa nian hato’o katak sidadaun
Indonézia na’in rua ne’e hanesan buronan iha lista Badan Narkotika Nasional
(BNN) – Indonézia nian tamba involve bebeik ona iha trafiku droga iha
Indonézia.
Aleinde hanesan fatin transit
ne’ebé utiliza husi grupu krime organizadu sira hodi hakat liu ba Indonézia no
iha mos rede ne’ebé existe ona iha rai laran ne’ebé involve pesoal balu husi
institusaun oin-oin Estadu Timor-Leste nian. Iha ne’ebé Komandante UPM-PNTL
Superintendente Polísia Lino Saldanha hato’o katak mosu iregularidade no
partisipasaun iha krime organizadu ne’ebé involve husi direjenti sira Alfândega
nian, APORTIL, Karentina, Ministériu Saúde no empreza Naroman Furak Unipessoal
Lda rasik.
Rekomendasaun
Ministériu Públiku loke
investigasaun ba dirijente sira servisu Alfândega nian no pesoal sira husi
institusaun relevante seluk ne’ebé deskonfia involve iha kazu kontentor 9 ne’e
nian inklui empreza importador ne’ebé tenta lori sai sasan kontentor 9 ho meius
exportasaun.
Governu presiza hadia servisu no
kontrolu sira iha portu no alfândega nian liu-liu atividade sira importasaun no
exportasaun via marítima.
Governu presiza monitorizasaun no
avaliasaun ida ne’ebé rigorozu ba servisu sira iha portu no alfândega nian hodi
prevene involvimentu pesoal sira nian iha atividade krime organizadu nian.
Atu hetan informasaun kle’an liu
kona-bá asuntu ne’e bele kontaktu:
Nélson Belo
Diretor Ezekutivu
Email: direktor.mahein@gmail.com
Telemovel: (+670) 78316075 ka
77561184
Website: www.fundasaunmahein.org
Sem comentários:
Enviar um comentário