Fretilín Hadi’a Hela Lista PN Antes Submete Ba TR

DILI, (TATOLI) – Adjuntu Sekretáriu Jerál Partidu Fretilín, José Reis, informa Partidu Frente Revolusionáriu Timor-Leste Independente (Fretilín) sei halo hela ajustamentu lista deputadu Parlamentu Nasionál (PN) ba Eleisaun Antisipada (EA) hafoin bele ba aprezenta iha Tribunal Rekursu (TR) hodi verifika.

“Prazu hatama lista deputadu Parlamentu Nasionál (PN) to’o de’it 20 Marsu, maibé daudaun ne’e partidu Fretilín sei halo hela ajustamentu hafoin submete ba Tribunál Rekursu atu verifika”, José Reis informa ba Jornalista sira iha Palásiu Governu, Kinta (01/03).

Nia dehan, kompozisaun lista deputadu partidu Fretilín ba PN iha eleisaun antesipada sei la iha deferénsia no nafatin hanesan lista uluk iha eleisaun lejizlativa 2017.

Enkuantu ba kampaña eleitorál partidu Fretilín daudaun ne’e preparadu ona liuhosi konsolidasaun estruturál, konsolidasaun polítika hafoin tama ba kampaña formál ne’ebé sei akontese iha 10 Abríl.

“Partidu Fretilín hanesan organizasaun polítika ida ne’ebé metin, preparasaun daudaun ne’e másimu ona atu konkorre iha eleisaun antesipada,” José Reis gaba.

Hodi dehan, seidauk iha data fiksu ruma atu Fretilín submete lista deputadu ba TR atu verifika, maibé iha tempu badak partidu Fretilín sei submete lista hafoin halo tiha ajustamentu, hodi nune’e Fretilín iha legalidade  kompete iha festa demokrasia tinan ida ne’e.

Entertantu kompozisaun lista kandidatu deputadu PN hosi partidu Fretilín hamutuk 31 nian iha eleisaun lejizlativa mak Mari Bim Amude Alkatiri, Francisco Miranda Branco, Josefa Alvares Pereira Soares, Aniceto Longuinhos Guterres Lopes, Joaquim dos Santos, Ilda Maria da Conçeicão.

Rui Maria de Araujo, Estanislau da C. Maria da Silva, Sidalia Mesquita Ximenes, David Dias Ximenes, José Agostinho Sequeira, Florentina da Conçeicão Pereira Martins “Smith”, Antonino Bianco, Ósorio Florindo da Conçeião Costa, Maria Angelica Rangel da Cruz dos Reis, Antonio dos Santos, Dario Madeira, Lidia Norberta dos Santos Martins, Gabriela Alves, Silvino Adolfo Morais.

Angelica da Costa, Domingos Savio Cabral Ribeiro, Fausto Freitas da Silva, Noemia Sequeira, Aurelio Freitas Ribeiro, Maria Anabela Savio, Alexandrino Cardoso da Cruz, Felix da Costa, Nurima Ribeiro Alkatiri, Gil Teofilo Amaral no Manuel de Araujo Martins.

Jornalista: Zezito Silva | Editór: Manuel Pinto

Imajen: José Reis. Foto espesiál