PR Konvida Ema Hotu Partisipa Iha Luta Foun

DILI, (TATOLI) - Prezidente Repúblika (PR), Francisco Guterres Lú Olo, iha abertura konferénsia nasionál veteranus, Sentru Konvensaun Dili (CCD-sigla Portugés), ohin, konvida ema hotu atu partisipa hodi fó kontribuisaun ba prosesu dezenvolvimentu, liu-liu veteranus.

Tuir Lú Olo, povu nia luta durante tinan rua nulu resin haat nia laran mak ohin loron Timor-Leste hetan independénsia totál tanba ne’e iha faze ukun-an presiza ema hotu nia kontribuisaun liuliu ba veteranu sira hodi kontribui ba prosesu dezenvolvimentu nasionál.

“Ita nia batalla hasoru okupasaun remata ona, maibé luta ba reforsa soberania no dezenvolvimentu ita nia rai sei hala’o nafatin tanba ne’e presiza ema hotu nia kontribuisaun,” Xefe Estadu Lú Olo konvida iha nia lia menon antes halo abertura ba selebrasaun loron nasionál veteranu ohin iha CCD.

Nia dehan tan, iha prosesu luta ba dezenvolvimentu presiza partisipasaun ema hotu nian ho espíritu serve povu no nasaun. Basa martir, veteranu no kombatente sira hakerek mai ita tinan 24 funu libertasaun no istória balun furak hosi istória ita nia nasaun nian.

Ho sakrifísiu hirak ne’e povu Timor-Leste hatudu kapasidade hodi kaer metin valór ne’ebé sira iha hodi harii identidade rasik hanesan povu ho vitória restaurasaun independénsia, marka deferénsia ho nasaun seluk no sai nasaun úniku eh unidu iha nasaun ida livre.

Iha mundu modernu, sosiedade livre no seguru hanesan ita nia nasaun, fasil atu haluha katak ita sai livre tanba eroi no veteranu sira. Rekoñese katak valór rezisténsia hotu ho sentru hosi povu lori valór nasaun nian no ita nia kultura liu fali interese ema ida nian.

Rezisténsia, kombatente no povu sira manan tanba sira nia neon metin ba valór no serve nasaun ho fuan tomak no laran moos, maibé bele fasil haluha verdade simples ida ne’e, maibé sé ita hakarak tebes duni atu lori ita nia rai ba oin ho di’ak atu ita labele haluha.

Enkuantu, étika rezisténsia nian mak veteranu no martir sira hodi serve nasaun ho laran luak, nune’e kombatente sira no povu sira servisu hamutuk ho vontade ida de’it.

Sai oradór iha semináriu komemorasaun loron nasionál veteranus, Primeiru Ministru Mari Alkatiri ho Eis Prezidente Repúblika Taur Matan Ruak.

Mari Alkatiri halo aprezentasaun ba tema “A Estrategia Nacional de Protecção Social” no Taur Matan Ruak ko’alia kona-bá “Espirito e Valores da Resistência na Consolidação do Estado e Degnificação dos Veteranos, Combatentes e suas Gerações Vindouras”

Jornalista: Zezito Silva | Editór: Manuel Pinto

Imajen: Prezidente Repúblika (PR), Francisco Guterres Lú Olo.