Governu Sei Kria Konsellu Veteranus Nasionál

DILI, (TATOLI) – Primeiru-Ministru, Marí Alkatiri fó sai katak governu sei kria konsellu veteranus atu rezolve preokupasaun husi veteranu sira. Enkuantu eis Prezidente Repúblika, Taur Matan Ruak, husu mantein estrutura iha tempu rezisténsia, no la konkorda halo mudansa.

“Atu kria Konsellu Nasionál Veteranu para veteranus rasik ho sira ninia organizasaun rasik bele ajuda estadu atu rezolve preokupasaun husi veteranus sira”, Mari Alkatiri hato’o iha ninia intervensaun iha Konferénsia ba komemorasaun loron nasionál Veteranus.

Nia dehan, dekretu lei uluk hetan veto dala rua husi eis Prezidente Repúblika Taur Matan Ruak, hafoin hetan veto fila fali husi Prezidente Repúblika, Francisco Guterres Lú Olo.

Tanba ne’e, governu agora diskute hela dekretu lei refere no sei rona hanoin sira hosi eis prezidente, Taur Matan Ruak ho Prezidente Lú Olo antes lori lei refere ba iha Prezidente Repúblika atu halo promulgasaun.

“Tenke rezolve uluk deferénsia ne’ebé lori ba veto atu dekretu lei ne’e la’o ba oin, maibé nia fiar katak dekretu lei ne’e bele hetan ona promulgasaun no sei halo kongresu ida atu halo kria Konsellu Nasionál Veteranu.” Alkatiri garante.

Iha fatin hanesan eis Prezidente Repúblika, Taur Matan Ruak, esplika uluk halo veto ba lei Konsellu Nasionál Veteranu tanba dekretu lei ho lei Parlamentu Nasionál (PN) la kona malu. Problema seluk, iha dekretu lei ne’e halo mudansa signifikativu ba iha estrutura veteranus nian.

Tuir Taur Matan Ruak, ideal liu estrutura konsellu veteranus tenke envolve nafatin estrutura rezisténsia ne’ebé mak iha ona, hanesan rejiaun 1 to’o 4, la’ós halo mudansa radikál.

“Dala ruma hahú ida ne’e mak ba tranzisaun para atu demokratiza lideransa ida, mas pelumenus ita hahú husi ne’ebé sei iha hanesan rejiaun sira no komandu sira ne’ebé sei iha,” Taur aprezenta.

No fó hanoin tan “Se bele foti fali sira uluk lidera, sira hadi’a depois ita halo tranzisaun.”

Jornalista: Julia Chatarina | Editór: Manuel Pinto

Imajen: Primeiru-Ministru, Mari Alkatiri no eis gerilleru, Taur Matan Ruak, iha seminariu ba selebrasaun loron veteranu nasional iha sentru konvensaun Dili. Foto Egas Cristovao