DILI, (TATOLI) – Aliansa
Mudansa ba Progresu (AMP) alerta ba militante no simpatizante sira atu respeita
partidu hirak ne’ebé mak atu konkore iha kampaña eleitorál to’o eleisaun
antesipada parlamentár.
“AMP husu ba militante sira atu
labele monu ba provokasaun, tenke respeita ema nia direitu, tenke respeita
partidu seluk nia komisiu atu labele mosu violénsia”, reprezentante AMP, Arão
Noe, ba jornalista sira hafoin enkontru ho Komisaun Nasionál Eleisaun
(CNE-sigla portugés) iha CNE, Kaikoli, ohin.
Sé mak kontra regra ruma iha
kampaña konsidera kazu individu no nain mak tenke responsabiliza tanba AMP la
fó ordem ba militante sira atu kontra ordem públiku, katak nia.
Afirma, AMP komprometidu katak
militante hotu sei kumpre regra eleitorál kampaña nian no sei simu rezultadu
saida de’it mak povu sei fó iha eleisaun jerál.
Enkuantu, AMP sei hahú abertura
kampaña iha Ainaru no prezensa hosi prezidente partidu tolu hanesan Partidu
Kongresu Nasionál Rekonstrusaun Timor (CNRT-sigla portugés), Kay Rala Xanana
Gusmão, Prezidente Partidu Libertasaun Populár (PLP), Taur Matan Ruak no
Konselleiru Superiór Partidu Kmanek Haburas Unidade Nasionál Timor Oan
(KHUNTO), Naimori Bucar.
Hafoin abertura kampaña, kada
prezidente partidu sei lidera ida-idak nia ekipa, ekipa dahuluk hosi Prezidente
CNRT, Kay Rala Xanana Gusmão, ekipa daruak lidera hosi Prezidente PLP, Taur
Maran Ruak no ikus liu Konselleiru superiór KHUNTO, Naimori Bucar, hosi
lideransa hirak ne’e sei lidera kampaña eleitorál to’o remata.
Nun’e, AMP iha kampaña aberta,
komísiu no mini kampaña ba munisípiu hotu inklui Rejiaun Autónomu Enklave
Oe-kusi Ambeno (RAEOA), enkuantu kampaña ikus AMP nian sei finaliza iha Tasi
Tolu.
Entretantu, programa AMP nian
preparadu ona no programa fundamentál liu mak atu restaura fali konstituisaun
no lei hanesan Estadu Direitu Demokrátiku Timor-Leste no atu defende rikusoin
Timor-Leste nian inklui programa hirak ne’ebé iha ona planu estratéjiku
dezenvolvimentu nasionál.
“Programa hirak ne’e mak sei sai
matéria fundamentu ba programa AMP nian kuandu manan iha eleisaun hodi kaer
governu ba mandatu tinan lima”, afirma tan.
Jornalista: Zezito Silva | Editora:
Rita Almeida
Imajen: Reprejentante AMP, Arao
Noe
Sem comentários:
Enviar um comentário