Sentavus ba Klínika Bairu Pité

DILI, (TATOLI) – Movimentu Solidariedade Salva Klínika Bairu Pité (MSS-KBP) ne’ebé mai hosi estudante, relijiozu, ativista, povu ai-leba, mídia, inan aman no entidade seluk, ohin hahú tun ba dalan halibur osan rahun hodi salva klínika Bairu Pité ne’ebé ameasadu taka tanba infrenta krize finanseira.

ʺGovernu tenke tau atensaun hodi garante sustentabilidade klínika ne’e ba futuru, tanba klínika ne’e eziste istorikamente hahú kedas okupasaun to’o ita hetan independensiaʺ, dehan portavós movimentu, Faustino Soares, bainhira halo asaun solidaridade iha área Motael, ohin.

Klínika ne’e hahú iha 1998 hodi fó tratamentu gratuita ba povu inklui vítima torturasaun hosi militár Indonézia.

Hafoin restaura independensia, klínika ne’e hola nia papél importante hodi halo tratamentu ba pasiente ne’ebé hetan moras tuberkulosis, HIV-AIDS no moras seluk.

ʺSolidaridade ne’ebé ami halo atu husu maluk timoroan sira nia tulun hodi fó apoiu komesa lima sen to’o boot hodi salva klínika Bairu Pitéʺ, tenik Faustino Soares.

Tuir nia bainhira klínika ne’ebé lidera hosi dr. Daniel Murphy taka sei fó impaktu direta ba povu kbiit laek sira atu asesu tratamentu saúde iha klínika komersiál seluk tanba laiha osan.

Dadaun ne’e prosesu atendementu ba pasiente iha klínika ne’e paradu, tanba pasiente balun transfere ona ba Ospitál Nasionál Guido Valadares kauza hosi laiha aimoruk no orsamentu hodi selu servisu nain sira.

Tanba ne’e, asaun solidaridade hodi halibur sentavus hahú ohin no remata iha loron 20 abril 2018.

Hatan ba kestaun ne’e, Primeiru-Ministru, Marí Alkatiri, hatete governu sei buka meiu hodi rezolve krize finanseira ne’ebé klínika ne’e infrenta.

ʺHa’u sei buka solusaun para labele fó impaktu negativu ba povuʺ, dehan Xefe Governu ba jornalista sira iha Ministériu Finansa, tersa, (3/4).

Jornalista: Agapito dos Santos | Editora: Rita Almeida

Imajen: Movimentu Solidariedade Salva Klínika Bairu Pité (MSS-KBP), ohin komesa halibur osan rahun hodi tulun Klínika Bairu Pité iha área Motael. Foto Tatoli/Agapito dos Santos