DILI, (TATOLI) – Membru
Parlamentu Nasionál hosi bankada Partidu Demokrátiku (PD), António da
Conceição, husu medida polítika ba Primeiru-Ministru hamutuk ho Aliansa Maioria
Parlamentár (AMP) atu hakotu impase polítika iha rai ida ne’e.
Deputadu ne’e dehan karik diálogu
sira ne’e kontinua la’o la’ós de’it iha nivel lider istóriku-sira maibé oinsá
diálogu ida ne’e bele hala’o mós iha nivel partidu polítiku-sira.
Sekretáriu Jerál PD levanta
kestaun ne’e liuhusi debate jeneralidade Orsamentu Jerál Estadu (OJE) 2018
ne’ebé hala’o iha Parlamentu Nasionál, tersa ne’e.
Tuir nia tempu to’o ona lider
nasionál-sira tuur hamutuk atu kontribui ba dezenvolvimentu nasionál duké
haketak malu beibeik hodi la fó lisaun di’ak ba jerasaun foun sira.
Iha parte seluk, deputada bankada
FRETILIN, Maria Angélica Rangel, rekomenda ba lider nasionál-sira tenke iha
konsensu nasionál hodi garante funsionamentu Estadu no dignidade Estadu hodi
hatudu ba mundu katak Timor-Leste mós iha lejitimidade aas hosi povu.
“Tanba ne’e maka ami husu ba
lider partidu polítiku-sira atu tuur hamutuk. Kestaun Estadu no kestaun
orsamentu Estadu imi tenke tuur hamutuk, nune’e ita bele iha lejitimidade hodi
fó solusaun ba Estadu no povu ne’e”, tenik.
Iha biban ne’e, Primeiru-Ministru,
Taur Matan Ruak, afirma diskusaun kona-ba hakotu impase polítika ne’e kestaun
pertenente no nia fiar tempu ba tempu timoroan sira sempre hatene oinsá hakat
liu nia problema no hotu-hotu sempre fó nia kontribuisaun ba rai ida ne’e nia
di’ak.
Jornalista: Xisto Freitas | Editora:
Rita Almeida
Imajen: Primeiru-Ministru, Taur
Matan Ruak, iha debate jeneralidade loron daruak iha uma fukun Parlamentu
Nasionál. Foto António Goncalves
Sem comentários:
Enviar um comentário