“Ha’u Preokupa Operadór Portál Governu Halo Fali Servisu Iha Rai Li’ur”

DILI, (TATOLI) – Deputadu Opozisaun Parlamentu Nasionál, hosi Partidu Demokrátiku (PD) Adriano do Nascimento, preokupa tebes operadór Portál Governu nian ne’ebé iha hela estranjeiru hafoin halo servisu ba Timor.

“Kuandu ha’u asume ministru, ha’u preokupa tebes tanba asesór ida ba opera portál governu halo fali servisu iha rai li’ur (Belgia-red). Informasaun governu nian ema iha nasaun seluk mak halo depois halo produsaun hafoin ita asesu,” Eis Ministru Prezidénsia Konsellu Ministru Adriano do Nascimento hato’o iha nia entrevista ba jornalista sira iha Parlamentu Nasionál, ohin.

Deputadu Adriano sujere ba governu konstitusionál da-8 nian atu haree polítika ba asuntu sira importante hanesan portal governu, tanba informasaun sai hosi governu depois ba tiha estranjeiru hafoin mai fali. Pior liu tan, mak la iha Timoroan ida mak akompaña asesór ne’ebé hela iha estranjeiru ne’e.

Pergunta, se asesór ne’e la transfere nia matenek ba timoroan, bainhira nia lakohi servisu ona ba timor, oinsá sustentabilidade portal governu nian.

“Asesór estranjeiru ne’e mai ho nia tempu, la’ós asesór to’o iha vida moris, balun lakohi ko’alia tan lian tetun, tanba ne’e, parlamentu diskute ona no aseita atu estabelese polítika atu asesór hotu tenke hatene dalen tetun  no iha obrigasaun atu hanorin Timoroan,” Vice Prezidente Bankada PD ne’e fó hanoin.

Ba nia, “Ita labele depende ba asesór rai li’ur, se kuandu mate ka fila, se mak halo servisu ne’e enkuantu Timoroan balun la akompaña.”

Entretantu, Ministru Prezidénsia Konsellu Ministru, Agio Pereira, lakohi fó komentáriu bainhira jornalista Tatoli aprosima hodi konfirmasaun.

Jornalista: Zezito Silva Editór: Manuel Pinto

Imajen: Deputadu Partidu Demokrátiku, Adriano do Nascimento. Imajen António Goncalves