DILI, (TATOLI) - Proposta haat
(4) hanesan proposta ho númeru 42, 74, 73 no 75 hosi partidu opozisaun FRETILIN
no PD la pasa iha diskusaun espesialidade ba orsamentu Ministériu Estadu
Prezidénsia Konsellu Ministru ho montante miloens $3,635 iha plenária Parlamentu
Nasionál, segunda ne’e.
Proposta 42 no 74 la pasa ho votu
afavór 25, kontra 35 no absten 4. Proposta númeru 73 la pasa ho votu afavór 27,
kontra 35 no absten 2. Entretantu, proposta númeru 75 la pasa ho votu afavór
24, kontra 35 no absten 4. Proposta hirak ne’e mai hosi deputadu sira hanesan
Maria Angélica Rangel, António da Conceição, Antoninho Bianco, Joaquim dos
Santos no Adriano do Nascimento.
Proposta 42 no 74 husu atu redús
mil $400 ba kategoria Bens no Serbisu hosi dotasaun inisiál mil $878 ba
Direrasaun Nasionál Administrasaun no Finansas iha órgaun Ministru Estadu
Prezidénsia Konsellu Ministru.
Proponente sira justifika katak
orsamentu ne’e konsidera boot tanba fó todan ba despeza rekorente sira, satán
serbisu efetivu ba tinan ida ne’e hela fulan tolu de’it.
Iha proposta númeru 73 ne’e husu
atu redús mil $178 hosi dotasaun inisiál ho montante mil $513 ne’ebé koloka ba
Diresaun Nasionál Lojístika no Patrimóniu iha Ministériu Estadu Prezidénsia
Konsellu Ministru nia tutela.
Razaun halo redusaun tanba
proponente sira haree katak orsamentu jerál Estadu (OJE) 2017 nian iha rúbrika
ida ne’e aloka ona mil $529 ba diresaun refere, maibé diresaun ne’e durante
periodu ne’ebá gasta orsamentu hira no halo saida laiha justifikasaun no OJE
2018 liuhusi diresaun refere halo proposta orsamentu ne’ebé hanesan mensiona
iha leten atu gasta mezmu tempu efetivu halo serbisu fulan tolu de’it.
Proposta númeru 75 husu atu redús
mil $900 hosi dotasaun inisiál miliaun $1 ne’ebé aloka ba rúbrika Kapitál Menór
tanba tempu limitadu (efetivu serbisu fulan tolu de’it).
Entretantu, Ministru Estadu
Prezidénsia Konsellu Ministru, Agio Pereira, esplika katak orsamentu hirak ne’e
atu prioritiza estabelesementu akizisaun mobiliáriu ba gabinete ministériu foun
sira (liu-liu ministériu foun ne’ebé nia ministru seidauk toma pose), reabelita
gabinete barak ne’ebé degrada ho grau ás, selu dívidas hosi Timor Telecom $213,
636, selu EDTL $846,240, selu dívidas ba Telkomcel $47,890.75, fasilita
catering (hahan) ba reuniaun importante sira iha Konsellu Ministru no sel-seluk
tan.
Jornalista: Xisto Freitas | Editór:
Manuel Pinto
Imajen: Deputadu sira halo
votasaun iha diskusaun espesialidade Orsamentu Jerál Estadu (OJE) 20018 iha uma
fukun Parlamentu Nasionál. Imajen António Goncalves
Sem comentários:
Enviar um comentário